ایم ایم کلبرگی قتل کیس میں اہم پیش رفت، سی آئی ڈی نے دو مشتبہ ملزمین کو گرفتار کرلیا
بنگلورو،15؍ستمبر(ایس او نیوز) معروف صحافی گوری لنکیش کے قتل کی تحقیقات کو انجام تک پہنچانے میں کافی حد تک کامیاب خصوصی تحقیقاتی ٹیم نے اب ریاست کے ایک اور معروف مصنف پروفیسر ایم ایس کلبرگی کے قتل کی جانچ میں پیش رفت حاصل کرلی ہے۔ اس سلسلے میں جانچ کو آگے بڑھاتے ہوئے ہبلی میں سی آئی ڈی نے دو ملزمین کو حراست میں لے لیا ہے۔ 30؍ اگست2015کو دھارواڑ میں ایم ایم کلبرگی کو نامعلوم حملہ آورؤں نے گولی ماری تھی، اس کے بعد سے ملزمین کی تلاش بسیار اب تک جاری تھی۔
گوری لنکیش قتل کے معاملے میں تحقیقات کو آگے بڑھانے میں مصروف خصوصی تحقیقاتی ٹیم نے اسی سلسلے میں ہبلی کے گنیش مسکین اور امت بدھی کو تحویل میں لے لیا ہے۔بتایاجاتاہے کہ ابتدائی جانچ کے دوران یہ سراغ برآمد ہوئے ہیں کہ ان دونوں کا تعلق کہیں نہ کہیں ایم ایم کلبرگی کے قتل سے جڑا ہوا ہے، سی آئی ڈی کے افسر ان ملزمین سے پوچھ تاچھ میں لگے ہوئے ہیں۔ ان پر شبہ ظاہر کیا جارہاہے کہ جس طر ح گوری لنکیش کے قتل میں ان دونوں نے ملزمین کا ساتھ دیاتھا اسی طرح ایم ایم کلبرگی کا قتل کرنے میں بھی ان دونوں نے کلیدی ملزمین کی مدد کی ہے۔پہلے ہی فورنسک لیباریٹری کی رپورٹ میں ثابت ہوچکا ہے کہ گوری لنکیش اور کلبرگی کو مارنے کے لئے ایک ہی طرز کا پستول استعمال کیا گیا ہے۔اس کے بعد خصوصی تحقیقاتی ٹیم نے یہ بھی پتہ لگایا کہ گوری لنکیش کو جہاں ایک شخص نے گوری ماری تھی، ایم ایم کلبرگی کو تین افراد نے تین گولیاں ماری تھیں۔