ہیلی کاپٹر معاملہ: ای ڈی نے عدالت کو بتایا، راجیو سکسینہ کے سرکاری گواہ بننے پر کوئی اعتراض نہیں
نئی دہلی، 14 مارچ(ایس او نیوز؍آئی این ایس انڈیا) ای ڈی نے آگسٹا ویسٹ لینڈ منی لانڈرنگ معاملے میں جمعرات کو دہلی کی ایک عدالت سے کہا کہ اگر ایک مبینہ بچولئے راجیو سکسینہ کو سرکاری گواہ بننے کی اجازت دی جاتی ہے تو اسے کوئی اعتراض نہیں ہے۔جانچ ایجنسی نے خصوصی جج اروند کمار کو بتایا کہ اگر سکسینہ کو سرکاری گواہ بنایا جاتا ہے تو ای ڈی کے لئے یہ مفید رہے گا۔اس معاملے میں سرکاری گواہ بننے خواہاں راجیو سکسینہ نے چھ مارچ کو بند کمرے میں ہوئی سماعت کے دوران عدالت میں اپنا بیان درج کرایا تھا۔اس کے بعد عدالت نے ان کے بیان کی کاپی معاملے کی سماعت کر رہے اسپیشل جج کو بھیج دی تھی۔عدالت نے ایمس کے ذریعہ سونپی گئی رپورٹ کا جائزہ لینے کے بعد انہیں طبی بنیاد پر ضمانت دے دی تھی۔عدالت معاملے پر 25 مارچ کو غور کرے گی۔دبئی واقع دو کمپنیوں ’یوایچ وائی سکسینہ‘ اور ’میٹرکس ہولڈنگز‘ کے ڈائریکٹر سکسینہ 3,600کروڑ روپے کے آگسٹا ویسٹ لینڈ گھوٹالہ معاملے میں ای ڈی کی جانب سے دائر چارج شیٹ میں نامزد ملزمان میں شامل ہیں۔ای ڈی نے اپنی چارج شیٹ میں اس معاہدہ کے مبینہ بچولئے عیسائی مشیل، آگسٹا ویسٹ لینڈ اور فنمیکنکاکے سابق ڈائریکٹرز اورسی اور برونی سپیگنولنی، فضائیہ کے سابق سربراہ ایس پی تیاگی اور سکسینہ کی بیوی شوانی کو بھی نامزد ملزم بنایا ہے۔