گری راج سنگھ کی ناراضگی پر بولے چراغ، میں نے خود ان سے بات کرکے نوادہ سیٹ چھوڑنے کی پیشکش کی تھی
پٹنہ ، 18 مارچ ( ایس او نیوز؍آئی این ایس انڈیا )جموئی سے لوک سبھا ممبر پارلیمنٹ اور لوک جن شکتی پارٹی کے پارلیمانی بورڈ کے چیئرمین چراغ پاسوان نے کہا کہ بہار میں این ڈی اے کم سے کم 36۔37 سیٹیں جیتے گی۔انہوں نے دعوی کیا کہ مہاگٹھ بندھن مکمل طور بکھر رہا ہے۔چراغ پاسوان نے کہا کہ ایل جے پی کی پارلیمانی بورڈ کی میٹنگ میں پارٹی کے امیدواروں پر فیصلہ ہوا لیکن آج امیدواروں کے نام کا اعلان نہیں کریں گے۔گوا کے وزیر اعلی منوہر پاریکر کو خراج عقیدت پیش کرنے کے لئے آج امیدواروں کے نام کا اعلان نہیں کیا گیا۔
وہیں نوادہ سیٹ ایل پی جی کے کھاتے میں جانے کے بعد گری راج سنگھ کی ناراضگی پر چراغ نے کہا کہ ان کی ناراضگی ہم یا میری پارٹی سے نہیں ہے،میں نے خود ان سے بات کرکے نوادہ سیٹ چھوڑنے کی پیشکش کی تھی۔بی جے پی نے ہی نوادہ سیٹ ہمیں دی ہے،نوادہ سیٹ کے علاوہ ویشالی، حاجی پور، سمستی پور، کھگڑیا اور جموئی ایل جے پی کے کھاتے میں گئی ہے،وہ بہار میں چھ سیٹوں پر انتخاب لڑے گی۔ادھر ذرائع بتا رہے ہیں کہ حاجی پور سے رام ولاس پاسوان کے بھائی پشوپتی کمار پارس الیکشن لڑ یں گے،اگرچہ اس کی کوئی سرکاری اعلان نہیں ہوا ہے،فی الحال پشوپتی کمار پارس بہار حکومت میں وزیر ہیں۔
