نئی دہلی:14/ اگست (ایس او نیوز/آئی این ایس انڈیا)نائب صدر جمہوریہ ہند جناب ایم وینکیا نائیڈو نے کہا ہے کہ بچوں کو ذمہ دار شہری بنایا جانا چاہئے ۔جناب وینکیا نائیڈو جی ڈی گوئنکا لا پیٹائٹ پری اسکول کے بچوں سے گفتگو کررہے تھے ،جو یوم آزادی کے موقع پر ان سے ملاقات کے لئے آئے تھے۔نائب صدر جمہوریہ موصوف نے کہا کہ ماں بچے کی پہلی معلمہ ہوتی ہے اور بچے کو ماں کے بارے میں اور مادری زبان میں تعلیم دی جانی چاہئے۔انہوں نے مزید کہا کہ ہمیں بچوں کو اپنی روایات اور مالامال وراثت کی تعلیم دینی چاہئے۔ بچوں کو ان کی مادری زبان میں تعلیم دی جانی چاہئے کیونکہ بچے اسی زبان سے مانوس ہوتے ہیں۔اس موقع پر نائب صدرجمہوریہ جناب ایم وینکیا نائیڈو نے اساتذہ کو یہ مشورہ بھی دیا کہ وہ بچوں کو ذمہ دار شہری بنانے کی ذمہ داری قبول کریں ۔انہوں نے کہا کہ گرو یعنی استاد بچوں کو تعلیم دئے جانے کے ذریعہ ہماری قوم کے مستقبل کی تعمیر میں اہم کردار ادا کرتا ہے ۔ انہوں نے کہا کہ ٹیکنالوجی بھی اہمیت کی حامل ہے لیکن کبھی بھی گروکی جگہ نہیں لے سکتا ۔