مینگلور 7/جنوری (ایس او نیوز) کرناٹک کے وزیراعلیٰ سدرامیا نے آج اتوار کو مینگلور دورہ کے بعد بیلتھنگڈی میں اخبارنویسوں سے گفتگو کرتے ہوئے بتایا کہ خدا اور مذہب کے نام پر کسی بھی بے قصور کا قتل کرکے فسادات برپا کرنے کی کوشش کو ہرگز برداشت نہیں کیا جائے گا۔ بیلتھنگڈی تعلقہ اسٹڈیم میں 76 کروڑ کے مختلف منصوبہ جات   کی سنگ بنیاد کی تقریبات کا افتتاح کرنے کے بعد وزیراعلیٰ نے کہا کہ  ہمیں فرقہ وارانہ خطوط کی  سیاست کو ختم کردینا چاہئے  ، انہوں نے کہا کہ کسی کی لاش کا سہارا لے کر سیاست کھیلنے کا سلسلہ بند کردینا چاہئےجس کے ذریعے   اقتدار  حاصل کرنے کی کوشش کی جاتی ہے۔

سدرامیا نے کہا کہ وہ کسی بھی حال میں کسی کو بھی قانون کو ہاتھ لینے  کی اجازت نہیں دیں گے اور قانون ہاتھ میں لینے والوں کے خلاف  سخت سے سخت کاروائی کریں گے۔ 

اس سے قبل  وزیر اعلیٰ  کو آج صبح جیسے ہی مینگلور اسپتال میں ایڈمٹ  عبدالبشیر کی موت کی اطلاع ملی ، انہوں نے اپنے تاثرات پیش کرتے ہوئے بتایا کہ  ملک میں اب نفرت کی سیاست کیلئے کوئی جگہ نہیں ہے۔ کوئی بھی پارٹی عوام کو مذہب کی بنیاد پر تقسیم کرتے ہوئے اقتدار حاصل نہیں کرسکتی۔ آگے کہا کہ کسی کو بھی  کسی کی لاش پر سیاست نہیں کرنی چاہئے۔ اگر مذہبی جذبات کو بھڑکایا جائے گا تو  اس سے معاشرہ کو شدید نقصان پہنچے گا، اس طرح  عوام کو تشدد کے لئے اُکسانے سے  کسی کا بھی کوئی فائدہ نہیں ہوگا۔

سدرامیا نے بی جے پی کا نام نہ لیتے ہوئے کہا کہ  اگر کوئی انسان فوت ہوتا ہے تو اُس سے مذہبی جذبات  بھڑکا کر سیاسی فائدہ حاصل کرنا بالکل غلط بات ہے۔ مزید بتایا کہ اگر کسی کی موت واقع ہوتی ہے تو ہر انسان کی یہ ذمہ داری بنتی ہے کہ وہ مرنے والے کے حق میں دُعا کرے، افسوس کا اظہار کرے اور اُس کے غم زدہ خاندان کے ساتھ اظہار ہمدردی کرتے ہوئے اُن کی ڈھارس بندھائے۔

سدارامیا نے کہا کہ بی جے پی  ورکرس حسب معمول  کسی کی بھی موت واقع ہونے پر لاش کو لے کر احتجاج پر اُتر آتے ہیں۔ سدارمیا نے عبدالبشیر کی موت پر کہا کہ اگر بی جے پی کے اندر انسانیت نام کی چیز زندہ ہے تو وہ عبدالبشیر کی موت پر بھی احتجاج کرکے دکھائے۔ انہوں نے سوال کیا کہ  آج بی جے پی احتجاج کیوں نہیں کررہی ہے ؟ کیا اس لئے کہ آج مرنے والا شخص مسلمان ہے ؟

سدارامیا نے کہا کہ ایسے لوگ  جن کے اندر انسانیت نہیں ہے، وہی  دوسرے انسان کا قتل کرتے ہیں، یہ انسانیت کے دشمن ہیں، کسی کو بھی ایک دوسرے کا قتل کرنے کے لئے اُکسانا نہیں چاہئے۔

خیال رہے کہ مینگلور میں 3 جنوری کو  دیپک رائو نامی ایک ہندو نوجوان کے قتل کے بعداُسی کا بدلہ لینے اُسی دن  ایک مسلم شخص عبدالبشیر پر  قاتلانہ حملہ  ہوا تھا، اُسی  کے پس منظر میں وزیراعلیٰ سدرامیا خطاب کررہے تھے۔ واضح رہے کہ  عبدالبشیر پر ہوئے حملہ کے بعد اُسے شدید زخمی حالت میں  مینگلور اے جے اسپتال میں نہایت نگہداشت والے کمرہ میں داخل کیا گیا تھا، جہاں اس کو بچانے کے لئے کئی آپریشن کئے گئے ، مگر آج اتوار کو وہ زخموں کی تاب نہ لاکر چل بسا ۔ یاد رہے کہ عبدالبشیر پر ہوئے حملہ کو لے کر پولس نے کل سنیچر کو چار لوگوں کو گرفتار کیا  تھا۔