وزیراعلیٰ ریاست کو مالی بحران سے نکالنے میں ناکام:کمار سوامی
بنگلورو:27؍مارچ(ایس اونیوز) فائنانس کا قلمدان اپنے قبضہ میں رکھنے والے وزیراعلیٰ سدارامیا ریاست کو مالی بحران سے بچانے میں مکمل طورپر ناکام ہوگئے ہیں۔ ریاستی اسمبلی میں آج جے ڈی ایس فلور لیڈر ایچ ڈی کمار سوامی نے وزیراعلیٰ پر راست یہ الزام لگایا۔ بجٹ پر بحث میں حصہ لیتے ہوئے انہوں نے کہاکہ حکومت قرضوں پر قرضے لیتی جارہی ہے۔ اس کی کوئی حد ہی نہیں۔ اس طرح قرضے کرکے حکومت نے عوام کو قرض کے بوجھ تلے دبادیاہے۔ انہوں نے کہاکہ سدارامیا سے یہ امید نہیں تھی کہ وہ ایسا بجٹ پیش کریں گے۔ عوام یہ امید کررہی تھی کہ سدارامیا اس مرتبہ ایک اچھا بجٹ پیش کریں گے۔ بشمول زرعی شعبہ کسی بھی شعبہ کے لوگ سدارامیا کے بجٹ سے خوش نہیں ہیں۔ سدارامیا کے بجٹ پر تنقید کرتے ہوئے کمار سوامی نے کہاکہ ایک طرف کسان خودکشی کرنے پر مجبور ہیں اس میں اضافہ ہورہاہے۔ ریاست میں بے روزگاری میں دن بہ دن اضافہ ہورہاہے۔ کسانوں اور بے روزگار نوجوانوں کیلئے بجٹ میں کوئی اعلان ہی نہیں کیاگیاہے۔ شعبہ صنعت میں کوئی ترقی نظر نہیں آئی۔ ٹیکس وصولی مقررہ نشانہ کے تحت نہیں ہورہی ہے۔ اگر حکومت ٹیکس دہندگان کے ساتھ سختی برتے تو دوہزار کروڑ سے زیادہ رقم سرکاری خزانہ میں جمع ہوگی۔ ریاست کے مختلف مقامات پر بنیادی ڈھانچوں کو فراہم کرنے میں حکومت ناکام ہوچکی ہے۔ حکومت مختلف سرکاری محکموں میں خالی پڑے اسامیاں بھرتی کرنے میں سنجیدہ ہی نہیں۔ ریاست کو غیرملکی سرمایہ بھی آنا کم ہوگیاہے۔ انہوں نے کہاکہ سال برائے 2017-18ء میں حکومت نے 2لاکھ کروڑ روپئے قرضہ حاصل کرنے کی تجویز تیار کی ہے۔