نئی دہلی،یکم اگست(ایس او نیوز؍آئی این ایس انڈیا)آئی سی سی خواتین ورلڈ کپ میں شاندار کارکردگی کے لئے ہندوستانی کپتان متالی راج کو حیدرآباد کے ایک تاجر چامڈیشور ناتھ نے منگل کو نئی بی ایم ڈبلیو کار تحفے میں دی۔متالی نے خواتین کرکٹ ورلڈ کپ 2017میں کل 409رنز بنائے، جو اس ورلڈ کپ میں کسی بھی کھلاڑی کا دوسرا سب سے زیادہ سکور ہے۔اس سے پہلے چامڈیشور نے سال 2007میں متالی کو شیورلے کار تحفے میں دی تھی۔متالی کویہ کار عظیم ہندوستانی بلے باز سچن تندولکر کے ہاتھوں ملی تھی۔

بتا دیں کہ انگلینڈ نے آئی سی سی خواتین ورلڈ کپ کے ایک دلچسپ مقابلے میں ہندوستان کو 9رنز سے شکست دے کر ورلڈ کپ پر قبضہ کیا تھا۔اس خطابی مقابلے میں شکست کے باوجود ہندوستانی کھلاڑیوں پر جم کر انعامات کی بارش ہورہی ہے۔پہلے بی سی سی آئی اور مہاراشٹر حکومت نے ٹیم کے ہر کھلاڑی کو 50-50لاکھ روپے نقد، پھر ریلوے نے 10کھلاڑیوں کو 13-13لاکھ روپے نقد اور ترقی دی تھی۔وزیر اعظم سے لے کرعظیم شخصیات تک نے ہندوستانی خواتین ٹیم کی جم کر تعریف کی۔