بنگلورو،18؍اپریل (ایس او نیوز) بشمول انجینئرنگ مختلف میڈیکل اور سائنس سے متعلق کورسوں میں داخلوں کے لئے آج ریاست کے 430؍امتحانی مراکز میں تین روزہ سی ای ٹی امتحان کاآغاز ہوا۔بنگلور اور ریاست کے دیگر مقامات سے تعلق رکھنے والے تقریباً دو لاکھ طلباء نے اس امتحان میں حصہ لیا۔ اس مرتبہ بشمول1,00,077طلبا اور98,568طالبات اور دیگرکے جملہ 1,98,645طلبا نے سی ای ٹی امتحان میں حصہ لیا ہے ۔ بنگلور کے بشمول کل 86؍امتحانی مراکز ریاست کے جملہ 430؍امتحانی مراکز میں ہورہے امتحان کے لئے450مشاہدین اور 860؍افراد پر مشتمل خصوصی اسکواڈ کو تعینات کیا گیا ہے ۔اس امتحان کے لئے جملہ 31,360؍افسروں اور معاونین کو ڈیوٹی پر تعینات کیا گیا ہے ۔متعلقہ ضلع میں ڈپٹی کمشنر کو متعلقہ امتحانی مراکز کے لئے کمشنر کی حیثیت سے تعینات کیا گیا ہے ۔ہر امتحان گاہ پر احتیاطی طور پر پولیس کامعقول بندوبست کیاگیا ہے تاکہ کسی بھی ناخوشگوار واقعہ سے نپٹا جاسکے ۔سی ای ٹی لکھنے والے طلبا امتحان کے دوران کوئی دھاندلی یانقل نویسی نہ کریں اس لئے امتحان گاہ میں کسی بھی قسم کی دستی گھڑی، کلائی پر باندھ کر یاجیب میں رکھ کر لے جانا منع ہے۔اس کے علاوہ امتحان گاہ میں ٹیابلٹ ،موبائل فون اور کیالکیولیٹر لے جانے کی اجازت نہیں۔

پی یو سی نتائج: اسی ماہ 30؍ اپریل کو پی یو سی سال دوم کے نتائج کا اعلان کردیا جائے گا۔یہ نتائج ویب سائٹ پر بھی دیکھے جاسکتے ہیں ۔ یکم مئی کو تمام متعلقہ کالجوں میں بھی شائع کئے جائیں گے ۔پچھلے سال2017 میں سی ای ٹی امتحان کیلئے ایک لاکھ 79ہزار طلبا نے عرضیاں داخل کیں ۔ اس مرتبہ ایک لاکھ98ہزار طلبا نے عرضیاں داخل کی ہیں ۔