بنگلورو۔9/دسمبر(ایس او نیوز) مرکزی وزیر اطلاعات وشہری ترقیات ایم وینکیا نائیڈو نے کہا کہ مرکزی حکومت کی طرف سے بہت جلد رابطہئ عامہ پالیسی وضع کی جائے گی۔آج شہر میں محکمہئ اطلاعات کے زیر اہتمام کل ہند کمیونیکیٹر کانفرنس کا افتتاح کرتے ہوئے انہوں نے کہا کہ سرکاری اور دیگر اطلاعات کو پوری معتبریت کے ساتھ عوام تک پہنچانے کی انتہائی اہم ذمہ داری عائد ہے۔ ان افسران کی یہ ذمہ داری ہے کہ حکومت کی طرف سے عوام کی فلاح وبہبود کیلئے جو پروگرام وضع کئے جاتے ہیں انہیں پوری دیانتداری سے پہنچائیں۔ انہوں نے کہاکہ سرکاری پروگراموں کو کامیاب بنانے اورعوام کو ان پروگراموں تک لانے کی ایک اہم ذمہ داری پبلک ریلیشن افسران پر عائد ہوتی ہے۔ ملک میں پبلک ریلیشن کے سلسلے میں حکومت نئی، شفاف اور جامع پالیسی لاگو کرنے کی تیاری میں ہے۔انہوں نے کہاکہ موجودہ دور میں یہ رجحان پروان چڑھ رہا ہے کہ میڈیا ان خبروں کی طرف زیادہ توجہ دیتا ہے جو ترقی سے ہٹ کر ہیں۔ پبلک ریلیشن افسران کی یہ ذمہ داری ہے کہ میڈیا کو ترقیاتی ایجنڈا کی طرف لانے کی کوشش کریں۔ میڈیا میں ترقیاتی امور کو حاشیہ پر رکھ کر شور شرابے اور ہنگامے کو نمایاں کیاجاتا ہے۔ حکومت کو اپنے پروگراموں کی تشہیر کیلئے اشتہارات کا سہارا لینا پڑتا ہے۔ وزیر موصوف نے کہاکہ ملک میں 1.12لاکھ اخبارات ہیں، لیکن حقیقی معنوں میں یہ تمام اخبارات نہیں چلتے، ان میں سے بعض اخبارات صرف اسی وقت شائع ہوتے ہیں جب اشتہار ہوتاہے۔انہوں نے کہاکہ لکھنو میں ایک پریس میں 65اخبارات کے چھپنے کے فرضی دستاویزات جمع کرائے گئے تھے، ان تمام پر روک لگانے کی ضرورت ہے۔ انہوں نے کہاکہ نئی پالیسی کے تحت پبلک ریلیشن افسران کی ذمہ داریوں کو وضع کیا جائے گا اور سرکاری کام قرار دے کر نظر انداز کرنے کے رجحان کو ختم کردیا جائے گا۔ انہوں نے بتایاکہ جدید ٹیکنالوجی اور مواصلات کو ہم آہنگ کرتے ہوئے الیکٹرانک میڈیا اور پرنٹ میڈیا کے علاوہ سوشیل میڈیا کا بھی استعمال کیا جائے تاکہ سرکاری اسکیموں اور اس کے فواعد عوام تک پہنچ سکیں۔ اس موقع پر ریاستی وزیر برائے شہری ترقیات جناب روشن بیگ، ملک کے معروف صحافی شیکھر گپتا، سچدا نندا مورتی، فلم اکاڈمی کے چیرمین راجیندر سنگھ بابو، سابق وزیر رام چندرے گوڈا، محکمہئ اطلاعات کے پرنسپل سکریٹری لکشمی نارائن، ڈائرکٹر وشو کمار وغیرہ موجود تھے۔