بنگلورو،16؍اکتوبر(ایس او نیوز؍عبدالحلیم منصور)بنگلوروشہر میں بارش کے نقصانات سے نمٹنے مرکز امداد کرے: جارجشہر میں ہوئی موسلادھار بارش کی وجہ سے جو تباہی مچی ہے اس سے نمٹنے کیلئے ریاستی حکومت مرکزی حکومت سے مناسب فنڈ کا مطالبہ کرے گی۔ اس کیلئے بہت جلد ہی مرکزی حکومت سے نمائندگی کی جائے گی۔آج ایک اخباری کانفرنس سے خطاب کرتے ہوئے کے جے جارج نے کہاکہ پچھلے ایک ماہ کے دوران شہر میں ہوئی موسلادھار بارش کی وجہ سے 1880کروڑ روپیوں سے زیادہ کا نقصان ہوا ہے۔اس سارے نقصان کو تنہا ریاستی حکومت برداشت نہیں کرپائے گی۔ اسی لئے مرکزی حکومت ریاست کا ساتھ دے ، تاکہ عوام کی مدد کی جاسکے۔ انہوں نے کہاکہ مرکز میں ریاست کی نمائندگی کرنے والے وزراء کو چاہئے کہ وزیراعظم نریندر مودی پر دباؤ ڈالیں اور کرناٹک سمیت بنگلور میں بارش کی تباہی سے جو نقصانات ہوئے ہیں ان کے متاثر کو امداد پہنچائی جاسکے۔ مسٹر جارج نے کہاکہ موسلادھار بارش کی وجہ سے بنگلور کے مختلف علاقوں میں جو تباہی مچی ہے حکومت اس سے نمٹنے اور راحت رسانی میں پیش پیش ہے، لیکن بارش کی جو شدت ہے کسی کو اس کا اندیشہ بھی نہیں تھا، اچانک اس غیر متوقع بارش کا سامنا بڑی مشکل سے کیاجارہا ہے ۔ نشیبی علاقوں میں پانی بھر جانے کے سبب لوگوں کو گھروں سے پانی نکالتے ہوئے گزارنا پڑا۔ انہوں نے کہاکہ شہر بھر میں بارش کے نتیجہ میں سڑکیں خراب ہوگئی ہیں اور بی بی ایم پی نے ان سڑکوں پر بارہ ہزار گڈھوں کی نشاندہی کی ہے، جن میں سے 5200 گڈھوں کو بند کردیا گیا ہے۔ باقی گدھوں کو دن رات کام کرکے جلد ہی بند کردیا جائے گا۔