سی بی ایس ای نے سال میں ایک بار نیٹ امتحان کے انعقاد کی تجویز پیش کی
نئی دہلی:27/اپریل(ایس او نیوز/آئی این ایس انڈیا) مرکزی ثانوی تعلیمی بورڈ (سی بی ایس ای)نے کالجوں اور یونیورسٹیوں کے لیے اساتذہ کی تقرری سے متعلق اہلیتی امتحان، قومی اہلیتی ٹیسٹ (نیٹ)سال میں ایک ہی بار منعقد کرنے کی تجویز دی ہے۔ذرائع کے مطابق،تجویز ابھی ابتدائی سطح پر ہے۔غور طلب ہے کہ سی بی ایس ای نے گزشتہ سال امتحان کے انعقاد سے فروغ انسانی وسائل کی وزارت کے سامنے اپنی معذوری ظاہر کرتے ہوئے کہا تھا کہ اس پر دیگر امتحانات کے انعقاد کا کام بھی رہتا ہے۔وزارت نے اس سلسلے میں کوئی گائڈلائن جاری نہیں کیاہے، وہیں سی بی ایس ای نے ابھی تک جولائی سے ہونے والی امتحان کے لیے نوٹیفکیشن جاری نہیں کیا ہے، جو عام طور پر ہر سال اپریل کے پہلے ہفتے میں جاری کردیا جاتا تھا۔فی الحال جونیئر ریسرچ فیلو شپ اور یونیورسٹیوں اور کالجوں میں اسسٹنٹ پروفیسر بننے کی اہلیت کے لیے ہر سال دو بار جولائی اور دسمبر میں نیٹ کے امتحان کا انعقاد کیا جاتا ہے۔کالجوں اور یونیورسٹیوں میں اساتذہ کی بھرتی کے لیے نیٹ امتحان پاس ہونا لازمی ہے۔