سی بی آئی ممبئی دھماکے کے ملزم کے قتل کی تحقیقات کرے گی
نئی دہلی، 25؍ستمبر(ایس او نیوز ؍آئی این ایس انڈیا )سی بی آئی نے 1993کے ممبئی دھماکوں کے ملزم حنیف کڑاوالا کے قتل کی تحقیقات شروع کر دی ہے جس نے اداکار سنجے دت کو اے کے- 56رائفل دی تھی۔ایجنسی نے اس سلسلے میں گینگسٹر چھوٹا راجن اور اس کے ساتھیوں کے خلاف مقدمہ درج کیا ہے۔سی بی آئی کے ترجمان آر کے گوڑ نے کہاکہ کڑاوالا کے قتل معاملہ کی تحقیقات ایجنسی نے شروع کر دی ہے۔ذرائع نے کہا کہ اس سلسلے میں مہاراشٹر حکومت کی اپیل کے بعد جانچ ایجنسی نے معاملے کو اپنے ہاتھ میں لیا ہے۔قوانین کے مطابق ریاستی پولیس کی طرف سے درج ایف آئی آر سے ایجنسی اپنی تحقیقات کا آغاز کرتی ہے۔انہوں نے کہا کہ کڑاوالا کے قتل کے سلسلے میں چھوٹا راجن، اس گروہ کے رکن گرو ساٹم اور دیگر کے خلاف آئی پی سی کی متعلقہ دفعات اور اسلحہ ایکٹ کے تحت مقدمہ درج کیا ہے۔دعوی کیا جاتا ہے کہ کڑاوالا ٹائیگر مینن کی ہدایت پر ممبئی تک ہتھیار لے کر آیا تھا جن کا استعمال 1993کے سلسلہ وار بم دھماکوں میں کیا گیا۔7 ؍فروری 2001کو تین نامعلوم افراد نے اس کے دفتر کے قریب اس کو قتل کر دیا تھا ۔ممبئی پولیس کو شبہ ہے کہ شہر میں ہوئے 12دھماکے کے بعد یہ کام راجن کا ہے۔دھماکے میں 257افراد ہلاک ہو گئے تھے اور 700سے زیادہ زخمی ہو گئے تھے۔الزام ہے کہ کڑاوالا نے دوسرے کے ساتھ مل کر سنجے دت کے گھر کے گیراج میں ہتھیاروں کاذخیرہ چھپایا تھا جن کا استعمال دھماکے میں ہوا۔بہر حال اداکار نے دھماکے میں کسی طرح کی سازش کی معلومات ہونے سے انکار کیا اور معاملہ میں ٹاڈا کے الزامات سے بری ہو گئے تھے۔