تملناڈو کو کاویری کا پانی فراہم کرنا ممکن نہیں:جئے چندرا
بنگلورو23؍اگست(ایس او نیوز)کاویری طاس میں آنے والے آبی ذخائر میں پانی کی سطح کافی کم ہے۔اسی لئے کرناٹک کے جنوبی علاقوں کے عوام کو پینے کا پانی مہیا کرانا بھی مشکل ہوچکا ہے، ان حالات میں تملناڈو کوپانی فراہم کرنے کے موقف میں کرناٹک بالکل نہیں ہے۔ یہ بات آج ریاستی وزیر قانون وپارلیمانی امور ٹی بی جئے چندرا نے کہی۔ اخباری نمائندوں سے با ت چیت کرتے ہوئے انہوں نے کہاکہ ریاست کے آبی ذخائر میں آج پانی کی سطح ، پانی کی قلت کے مسئلے اور بارش کی کمی کی صورتحال سے حکومت عدالت کو آگاہ کرائے گی اور گذارش کرے گی کہ تملناڈو کو پانی فراہم کرنے سے کرناٹک کو رعایت دی جائے۔ انہوں نے کہا کہ یہ بات سچ ہے کہ ٹریبونل کے فیصلے کے مطابق تملناڈو کو پانی فراہم کرنا ہے ، لیکن جب بارش ہی نہ ہو اور آبی ذخائر خالی ہوں تو پانی کہاں سے لائیں۔ حکومت تملناڈو کی طرف سے عدالت سے رجوع کئے جانے پر انہوں نے کہا کہ ریاستی حکومت عدالت کو حالات سے واقف کرائے گی۔ پھلوں اور ترکاریوں کی قیمتوں میں بے تحاشہ گراوٹ پر ایک سوال کا جواب دیتے ہوئے وزیر موصوف نے کہاکہ بیرون ملکوں سے پھلوں اور ترکاریوں کی برآمد میں اضافہ قیمتوں میں گراوٹ کا سبب بنا ہے۔مرکزی حکومت کو اس صورتحال سے نمٹنے کیلئے فوراً مداخلت کرنی چاہئے۔ قیمتوں میں گراوٹ کے سبب رعیتوں کو جو نقصان ہورہاہے فوری طور پر اس سے نمٹنے کیلئے قدم اٹھائے نہیں گئے تو کسانوں کی مشکلات اور بڑھ جائیں گی۔ سپاری اور ناریل کی قیمتوں میں گراوٹ کو دیکھتے ہوئے ریاستی حکومت کی طرف سے یہ گذارش کی گئی ہے کہ مرکزی حکومت مداخلت کرتے ہوئے تائیدی قیمت دینے کا اعلان کرے، لیکن اب تک اس پر کوئی توجہ نہیں دی گئی ہے۔