بنگلورو:19/اپریل(ایس او نیوز) برہت بنگلور مہانگر پالیکے کی حدود میں شامل 110 دیہاتوں کو کاویری کاپانی مہیا کرانے کیلئے 1886 کروڑ روپیوں کے منصوبے کا آج وزیر اعلیٰ سدرامیا نے آغاز کیا۔ اس موقع پر خطاب کرتے ہوئے انہوں نے کہاکہ کاویری پانچویں اسٹیج کے پراجکٹ کی تکمیل کے ساتھ شہر بنگلور کے مزید علاقوں کو پینے کے پانی کی سربراہی ممکن ہوسکے گی۔پانچ ہزار کروڑ روپیوں کی لاگت پر اس پراجکٹ کو مکمل کیا جارہاہے۔سدرامیا نے کہا کہ ان کی حکومت قول اور فعل کی پابند حکومت ہے۔ یہ وعدہ کیاگیاتھاکہ بی بی ایم پی کی حدود میں شامل ہونے والے نئے دیہاتوں کوکاویری کاپانی مہیا کرایا جائے گا۔ اس وعدہ کی تکمیل کرتے ہوئے پانی کی سربراہی کا کام آج سے شروع کیا جارہاہے۔ انہوں نے کہاکہ آنے والے دنوں میں ریاست کی ترقی کیلئے منصوبوں کوآگے بڑھانے کے ساتھ اور بھی عوام پرور فلاحی اسکیمیں لاگو کی جائیں گی۔ انہوں نے کہا کہ جن 110 دیہاتوں کو آج سے پینے کے پانی کی فراہمی کے کام کا آغاز ہورہا ہے، جلد ہی ان دیہاتوں کیلئے مستقل ڈرینج نظام بھی مہیا کرایا جائے گا۔اس موقع پر خطاب کرتے ہوئے وزیر برائے ترقیات بنگلور کے جے جارج نے کہا کہ ریاستی حکومت شہر کی ترقی کی پابندہے۔ آنے والے دنوں میں اور بھی بڑے بڑے منصوبوں کو عملی شکل دی جائے گی، اس کیلئے حکمت عملی وضع کرنے کا سلسلہ چل پڑا ہے۔ تقریب میں وزیر زراعت کرشنا بائرے گوڈا، رکن اسمبلی بائرتی بسوراج، میئر جی پدماوتی، راجیہ سبھا ممبر کے سی رام مورتی، اراکین اسمبلی اروند لمباولی، وشواناتھ، کارپوریٹر رادھما وینکٹیش، بی ڈی اے ممبر جگدیش ریڈی وغیرہ موجود تھے۔