یلاپور میں بھینسوں سے بھری لاری کو پولس نے کیا ضبط؛ چار گرفتار؛ غیرقانونی طور پر جانوروں کو منتقل کرنے کا الزام
کاروار11/اکتوبر (ایس او نیوز) ضلع اُترکنڑا کے یلاپور میں پولس نے ایک لاری کو روکتے ہوئے اُس میں سے 18 بھینسوں کو برآمد کرتے ہوئے اپنی تحویل میں لیا ہے، جس کے تعلق سے پولس کا کہنا ہے کہ جانوروں کو غیر قانونی طور پر ایک جگہ سے دوسری جگہ لے جارہا تھا۔ پولس نے لاری پر سوارچار لوگوں کو بھی گرفتار کیا ہے اور اُن پر غیر قانونی طور پر جانوروں کی منتقلی کا الزام عائد کیا ہے۔
ذرائع سے ملی اطلاع کے مطابق جانوروں کو لاری پر لاد کر مہاراشٹرا کے کولہا پور سے کیرالہ کے کاسرکوڈ لے جایا جارہا تھا، منگل اور بدھ کی درمیانی شب کو یلاپور پولس نے لاری کو روک دیا اور جانوروں سمیت لاری کو بھی اپنے قبضہ میں لیتے ہوئے چاروں لوگوں کو گرفتار کرلیا۔
گرفتار شدگان کی شناخت لاری ڈرائیور عبدالجلیل (49)، ساتھی ڈرائیور کے بالا امبو(48)، احمد کبیر عبداللہ (30) اور سمیر احمد (32) کی حیثیت سے کی گئی ہے۔ یہ سبھی لوگ کاسرکوڈ کے رہنے والے ہیں۔
گرفتار شدگان کو یلاپور عدالت میں پیش کرنے کے بعد جانوروں کو گوشالہ بھیج دیا گیا ہے۔