یوپی انتخابات: کمل نشان کے ساتھ ووٹ ڈالنے پر کیشو پرساد موریہ کے خلاف ایف آئی آر درج
الہ آباد، 25 فروری(ایس او نیوز/آئی این ایس انڈیا) کمل نشان کے ساتھ ووٹ ڈالنے کے معاملے میں یوپی بی جے پی کے صدر کیشو پرساد موریہ کے خلاف آج ان کے آبائی شہرالہ آباد میں ایف آئی آر درج کر لی گئی ہے۔کیشو کے خلاف الہ آباد کے سول لائنس پولیس اسٹیشن میں پیپلز رپریزیٹیشن ایکٹ کی دفعہ171 کے تحت کیس درج کیا گیا ہے۔ایف آئی آر درج ہونے کے بعد اب اس معاملے کی تحقیقات پولیس کرے گی۔ کیشوکے خلاف ایف آئی آر درج کرنے کا حکم مجسٹریٹ جانچ کی رپورٹ کی بنیاد پر آج ہی دیا گیا تھا۔غور طلب ہے کہ یوپی بی جے پی کے صدر کیشو پرساد موریہ نے تئیس فروری کو الہ آباد میں ووٹنگ کے دوران زعفران رنگ کی جو ہاف جیکٹ پہنی ہوئی تھی، اس پر بی جے پی کی انتخابی نشان کمل سٹکر لگا ہوا تھا۔قوانین کے مطابق یہ براہ راست طور پر کامل ضابطہ اخلاق کی خلاف ورزی ہے۔کمل نشان کے ساتھ پولنگ سینٹر میں داخل ہونے اور ووٹ ڈالنے کی تصاویر سامنے آنے کے بعد الہ آباد کے ڈی ایم اور الیکشن افسر سنجے کمار نے اس معاملے میں مجسٹریٹ کی انکوائری کا حکم دیاتھا۔ شہر مجسٹریٹ کی جانچ رپورٹ کی بنیاد پر ذیلی ضلع الیکشن افسر مہندر کمار رائے نے آج اس کیس کے ایف آئی آر درج کرنے کا حکم دیا۔