اڈپی میں کار اوراسکوٹر کی ٹکر ،اسکوٹر سوار ہلاک
اڈپی24؍اپریل(ایس او نیوز)اندرالی جنکشن کے پاس اسٹیٹ ہائی وے پر انووا کار اور اسکوٹر کے بیچ ہونے والے تصام میں ستیش نائک (46سال) نامی اسکوٹر سوار ہلاک ہوگیا ہے۔
رپورٹ کے مطابق ستیش نائک منی پال پاور پریس میں مشین آپریٹر کا کام کررہا تھا۔ اندرالی جنکشن میں جب اس نے اچانک ٹرن لے لیا تو پیچھے سے آنے والی انووا کار کا ڈرائیور اپنی گاڑی پر قابو نہیں رکھ پایا، جس کے نتیجے میں اسکوٹر کے ساتھ کار ٹکرا گئی۔ ستیش نائک شدید زخمی حالت میں کچھ دیر تک جائے حادثہ پر پڑا رہا ۔ اس کے بعد کچھ رکشہ ڈرائیوروں نے اسے اسپتال پہنچایا۔ مگر ڈاکٹروں کی تمام تر کوشش کے باوجود اسے بچایا نہیں جا سکا۔
کہتے ہیں کہ جب حادثہ ہوا توکچھ نوجوان سامنے بار میں بیٹھے شغل مئے نوشی کررہے تھے۔ان میں سے کوئی بھی ستیش نائک کی مدد کے لئے نہیں پہنچا۔ لیکن جب پولیس جائے حادثہ پر معائنے کے لئے پہنچی اور ڈرائیور کو اپنے ساتھ لے جانے لگی تو یہ لوگ پولیس کے ساتھ بحث و مباحثے کے لئے کود پڑے، اور ڈرائیور کو خود ہی سبق سکھانے کے لئے اپنے حوالے کرنے کا مطالبہ کرنے لگے ۔ گرما گرم بحث کے دوران ایسالگا کہ یہ لوگ پولیس کے ساتھ ہاتھا پائی کے لئے تیار ہوگئے ہیں۔ مگر پولیس نے جب پنچ نامہ تیار کرکے ان لوگوں کو گواہ کے طور پر دستخط کرنے کے لئے کہا تو ایک ایک کرکے سب وہاں سے کھسک گئے۔