نیترانی جزیرہ کے قریب ڈوبنے والی بوٹ بھٹکل بیلکے ساحل سمندر کے قریب پہنچ گئی؛ دولاپتہ ماہی گیروں کا ہنوز کوئی پتہ نہیں
بھٹکل 2/جون (ایس او نیوز) چار روز قبل یعنی منگل کو نیترانی جزیرہ کے قریب ڈوبنے والی "اینجل ون" ماہی گیری بوٹ آج سنیچر کو ہوا کے دبائو اور موجوں کے کھینچائو پر بیلکے کے ساحل کے قریب سمندر میں اوندھی حالت میں تیرتی ہوئی پائی گئی۔ یہ بوٹ ابھی بیلکے ساحل سمندر سے قریب دو سو میٹر کی دوری پر ہے اور ایسا لگتا ہے کہ بوٹ اب لاوارث حالت میں ہے۔
خیال رہے کہ منگل 29/مئی کی صبح تمل ناڈو کی یہ بوٹ نیترانی جزیرہ کے قریب طوفانی بارش کے نتیجے میں اُلٹ گئی تھی اس میں جملہ چھ ماہی گیر سوار تھے، جس میں سے چار ماہی گیر قریب میں ہی واقع اینجل ٹو بوٹ تک پہنچنے میں کامیاب ہوگئے تھے اور دو ماہی گیر سمندر میں غرق ہوکر لاپتہ ہوگئے تھے، لاپتہ ہونے والے ماہی گیروں کا ابھی تک کوئی پتہ نہیں چل پایا ہے۔
خیال رہے کہ اینجل ٹو بوٹ کا انجن خراب ہونے کی وجہ سے وہ بوٹ بھی نیترانی جزیرہ کے قریب بری طرح پھنس گئی تھی جس میں پہلے سے سات ماہی گیر موجود تھے۔بعد میں مینگلور کوسٹ گارڈ نے سبھی پھنسے ہوئے ماہی گیروں کو اُڈپی کے ملپے بیچ پہنچادیا تھا اور اگلے روز انیجل ٹو بوٹ کی بھی مرمت کی گئی تھی اور وہ بوٹ تمل ناڈو کی طرف روانہ ہوگئی تھی۔
