منشیات کے استعمال ،سڑکو ں پر تحفظ اور ماحولیاتی آلودگی سے متعلق بیداری کے لئے بزرگ سائیکل سوار کی مہم؛ بھٹکل میں ایک دن رکنے کے بعد گوا کے لئے روانگی
بھٹکل13؍دسمبر (ایس او نیوز)سڑکو ں پر تحفظ ، منشیات کے استعمال اور ماحولیاتی آلودگی سے متعلق عوام میں بیداری پیدا کرنے کے لئے اڑیسہ کے ایک بزرگ نے سائیکل پرسوارہو کر ملک کی 10 ریاستوں کا سفرکرنے کی مہم چلارکھی ہے۔
سیدفیضان نامی 62سالہ بزرگ 12دسمبر کو بھٹکل سے ہوتے ہوئے جب گوا کی طرف روانہ ہوئے تو ان سے بات چیت کرنے پر معلوم ہواکہ دس ریاستوں کے سفر کا منصوبہ جو انہوں نے بنایاہے اس کے مطابق اب تک اڑیسہ، آندھراپردیش، کرناٹکا، تملناڈو اور کیرالہ سے گزرکر انہوں نے3500کیلومیٹر کا سفر طے کرلیا ہے۔ اور اب مزید تقریباً 2500کیلومیٹر کا سفر طے کرنا باقی ہے۔ انہوں نے بتایا کہ وہ روزانہ تقریباً 130تا140کیلومیٹر کا سفر طے کرتے ہیں۔پہاڑی اور چڑھاؤ والے راستے درپیش ہوں تو 60تا70کیلومیٹر تک کا سفر طے ہوتا ہے۔ سید فیضان نے بتایا کہ انہوں نے ایم کام تک تعلیم حاصل کی ہے اور وہ15برس تک دمام سعودی عربیہ میں اکاونٹنٹ اور آڈیٹر کی خدمات انجام دے چکے ہیں۔ فی الحال وہ اڑیسہ کے کٹک میں واقع اشوک لی لینڈ کمپنی میں انٹرنل آڈیٹر کی ذمہ داری نبھا رہے ہیں۔ان کی دو لڑکیا ں ہیں جن میں سے ایک کی شادی ہوچکی ہے اور دوسری بنگلورو میں ایم بی اے کی تعلیم حاصل کررہی ہے۔ ان کی اس بیداری مہم کے سفری اخراجات اڑیسہ کا محکمہ آر ٹی او برداشت کررہا ہے۔
سید فیضان نے اپنی اس بیداری مہم کے تعلق سے بتایا کہ ہر سال لاکھوں افراد سڑک حادثات میں موت کے منھ میں چلے جاتے ہیں۔منشیات کا استعمال بھی انسانی جان کے لئے ہلاکت خیزہوتا ہے۔عوام او رنوجوانوں کو اس سلسلے میں بیدار ہونا چاہیے۔ اس کے علاوہ انسانی صحت کے فائدہ مند ماحول کو بنائے رکھنے کے لئے ماحولیاتی آلودگی پر قابو پانا بہت ہی ضروری ہے۔اس میں ہر کسی کو آگے بڑھ کر ایک دوسرے کا ساتھ نبھانا چاہیے۔
سید فیضان کی بھٹکل آمد کے موقع پر گلف کے ان کے ایک رفیق محمد فیاض لاٹ نے ان کا استقبال کرتے ہوئے مہمان نوازی کی جبکہ معروف سماجی کارکن جناب نذیر قاسمجی نے اس عمر میں بھی سائکل پر سوار ہوکر ملک کا چکر کاٹنے پر ان کی ہمت کی داد دی اور خراج تحسین پیش کیا۔