کابینہ میں توسیع کے متعلق کمار سوامی کریں گے راہل گاندھی سے ملاقات
بنگلورو،4؍اکتوبر(ایس او نیوز) ریاستی کابینہ میں توسیع کے متعلق وزیراعلیٰ ایچ ڈی کمار سوامی کل دہلی میں صدر کانگریس راہل گاندھی سے ملاقات کرنے والے ہیں۔ 10یا 12اکتوبر کو ممکنہ کابینہ ردوبدل کی خبروں کے درمیان کمار سوامی اور راہل گاندھی کے درمیان ملاقات اہمیت کی حامل سمجھی جارہی ہے۔ایسے وقت میں جبکہ لوک سبھاانتخابات قریب ہیں اور کابینہ میں ردوبدل میں مزید تاخیر سے ریاستی حکومت کا استحکام خطرے میں پڑنے کے خدشے ظاہر کئے جارہے ہیں، کمار سوامی نے ریاستی کابینہ میں کسی بھی وقت توسیع اور ردوبدل کے ذریعے مکمل کرنے کے خواہاں ہیں۔
وزارت نہ ملنے سے ناراض متعدد کانگریس اراکین اسمبلی بغاوت پر اتر آئے ہیں۔انہیں خاموش کرنے کے لئے وزارت میں یہ توسیع ناگزیر سمجھی جارہی ہے۔ بتایاجاتاہے کہ راہل گاندھی سے ملاقات کے بعد کمار سوامی دہلی میں وزیر داخلہ راجناتھ سنگھ سے بھی ملاقات کریں گے اور ریاست کے سیلاب زدہ علاقوں میں راحت کاری کے لئے مرکزی حکومت کی امداد فوراً فراہم کرنے کامطالبہ دہرانے کے ساتھ ریاست کے 116 تعلقہ جات میں خشک سالی کی صورتحال سے نپٹنے کے لئے فنڈ مہیا کرانے کی بھی مانگ کریں گے۔