کابینہ میں توسیع کے لئے کانگریس لیڈروں کا تانتا سدرامیا کے ارد گرد
بنگلورو،5؍اکتوبر(ایس او نیوز) ریاستی وزارت کی توسیع اور ردوبدل کے متعلق وزیراعلیٰ ایچ ڈی کمار سوامی کی تصدیق کے فوراً بعد وزارت کے دعویداروں کا تانتا سابق وزیراعلیٰ اور رابطہ کمیٹی کے چیرمین سدرامیا کے پیچھے بندھ گیاہے۔ آج وزارت کے دعویداروں نے کے پی سی سی صدر دنیش گنڈو راؤ اور سدرامیا سے الگ الگ ملاقات کرکے ان سے وزارت کی تشکیل کے متعلق تبادلۂ خیال کیا اور وزارت کے لئے اپنی دعویداری پیش کی،سدرامیا سے ملاقات کرنے والوں میں دنیش گنڈو راؤ ، اراکین اسمبلی ڈاکٹر سدھاکر ، توکا رام ، رکن کونسل ریونا اور دیگر لیڈران شامل تھے۔اگلے ہفتے ریاستی کابینہ میں توسیع کرنے وزیر اعلیٰ کمار سوامی کے واضح اشاروں کے درمیان وزارت پر اپنی دعویداری کو مضبوط کرنے کے لئے سدرامیا سے ان لیڈروں کی ملاقات اہمیت کی حامل تصور کی جارہی ہیں۔ سدرامیانے دنیش گنڈو راؤ اور کے پی سی سی کارگزار صدر ایشور کھنڈرے سے الگ بات چیت کی اور ریاستی کابینہ کی تشکیل کے متعلق اعلیٰ کمان کی طرف سے انہیں جو اختیار دیاگیا ہے اس کے متعلق اپنا موقف واضح کیا۔ وزارت کی توسیع کے مرحلے میں علاقائی ، ذات پات اور سینارٹی کو ملحوظ رکھتے ہوئے نمائندگی دینے کے متعلق تبادلۂ خیال کیاگیا۔ کانگریس کے حصے میں آنے والے 6وزارتوں کے لئے 22 سے زائد دعویدار ہیں ، ان میں سے بعض وزارت نہ ملنے پر پارٹی کو خیر باد کہنے کی دھمکی دینے لگے ہیں۔اس صورتحال سے نپٹنے کے لئے کیا حکمت عملی اپنائی جائے اس پر سدرامیا نے پارٹی لیڈروں سے تبادلۂ خیال کیا۔