بنگلورو اور منگلورو کے درمیان کے ایس آر ٹی سی بس سرویس بحال؛ کیرالہ اور کورگ کے لئے بھی بس سروس پھر سے شروع
منگلورو،20؍اگست(ایس او نیوز)کیرلا منگلورو اور کورگ کے علاقوں میں بارش کی زبردست تباہی کے سبب ان علاقوں کو بسوں کی آمد ورفت کا جو سلسلہ رکا ہوا تھا اسے بحال کردیا گیا ہے۔
کے ایس آر ٹی سی نے آج اپنی کیرلا ، منگلور اورکورگ سرویس پھر سے شروع کردی ہے۔ کیرلا کے لئے تمام بسوں کی روانگی اب کدرے مکھ کے راستے سے ہوگی۔ منگلور کے لئے بھی بسوں کی روانگی کا سلسلہ کل رات سے بحال ہوگیا۔
منگلور وکی طرف جن بسوں کو روانہ کیا جارہا ہے، ان بسوں کی نگرانی کے لئے گھاٹ سیکشن میں خصوصی عملہ متعین کیاگیا ہے، خاص طور پر ان مقامات پر جہاں زمین کھسکنے کے واقعات پیش آئے ہیں یا پھر سڑکوں پر دراڑیں پڑی ہیں وہاں پر بسوں کے گزرتے وقت خصوصی احتیاط برتی جارہی ہے۔
کے ایس آر ٹی سی کی طرف سے منگلور وکے لئے ایرا وت بس سرویس بحال کردی گئی ہے، جبکہ دیگر کے ایس آر ٹی سی بسوں کی بحالی کا سلسلہ آج کسی بھی وقت چل پڑنے کا امکان ہے۔ اس کے علاوہ کیرلا کے یرنا کولم کوٹایم ، ترچور، پالگھاٹ، کالی کٹ اور تروندرم کے لئے آج کے ایس آر ٹی سی خدمات بحال ہوگئیں۔ دوسری طرف بارش سے بدحال کیرلا میں آج فضائی خدمات بھی بحال ہوگئیں۔
پچھلے ایک ہفتے سے بارش کے سبب بند کیرلا کے کوچن ایر پورٹ کو آج جزوی طور پر کھولا گیا۔ بنگلور وسے اڑان بھرنے والے ایر انڈیا کے طیارے نے یہاں کے بحریہ ایر بیس پر لینڈنگ کی ۔راحت کاری اشیاء کے ساتھ سو سے زائد مسافر اس طیارے سے کوچی کے لئے روانہ ہوگئے۔ یہاں کے بحریہ بیس پر امدادی اشیاء اتار لی گئیں۔ اس کے علاوہ منگلور اور ہاسن کے درمیان بھی آج سے کے ایس آر ٹی سی بس خدمات بحال کردی گئیں۔