کمٹہ 24/جولائی (ایس او نیوز) یہاں دیوگی نیشنل ہائی وے 66 پر ہوئے کار اور بس کے درمیان ہوئی خطرناک ٹکر میں دو لوگوں کی موقع پر ہی موت واقع ہوگئی، جبکہ ایک بچہ منی پال لے جانے کے دوران راستے میں توڑ دیا۔ حادثے میں چار دیگر افراد شدید زخمی ہوئے ہیں جن میں ایک بچہ بھی شامل ہے۔
حادثہ پیر کی صبح اُس وقت پیش آیا جب مینگلور سے گوکرن کی طرف جانے والی کار کا پہیہ اچانک پھٹ جانے کے نتیجے میں مخالف سمت سے آنے والی بس سے تیز رفتاری کے ساتھ ٹکراگئی۔ حادثے کی شدت کا اندازہ اسی بات سے لگایا جاسکتا ہے کہ ٹکر لگتے ہی کار ڈرائیور سمیت کار پر سوار ایک خاتون نے موقع پر ہی دم توڑدیا، جبکہ کار پر سوار پانچ لوگ شدید زخمی ہوگئے، جس میں سے ایک بچے نے بعد میؓں دم توڑ دیا۔ حادثے میں کار کا اگلا حصہ بھی مکمل طور پر ٹوٹ پھوٹ کا شکار ہوگیا ہے اور بس کے اگلے حصے کو بھی شدید نقصان پہنچا ہے۔
زخمیوں کو فوری طور پر مقامی سرکاری اسپتال میں ابتدائی طبی امداد دینے کے بعد منی پال روانہ کیا گیا ۔
مرنے والوں کی شناخت کار ڈرائیور پرشنا ، کار پر سوار ششی کلا اور اس کا تین سالہ بیٹا شاشوت کی حیثیت سے کی گئی ہے، جبکہ زخمیوں میں نندنی، سومیا، ششانک اور سچن شامل ہیں، ان سبھی کا تعلق مینگلور سے بتایا گیا ہے۔
ٹکر لگتے ہی کمٹہ دیوگی نیشنل ہائی وے پر ٹریفک نظام متاثر ہوا، مگر پولس فوری طور پر جائے وقوع پر پہنچتے ہوئے ضروری اقدامات کئے۔
کمٹہ پولس تھانہ میں معاملہ درج کیا گیا ہے اور پولس مزید چھان بین کررہی ہے۔