بلند شہر: قصورواروں کو سخت سزادی جانی چاہیے: مایاوتی
نئی دہلی،04؍ دسمبر (ایس او نیوز؍آئی این ایس انڈیا)بہوجن سماج پارٹی (بی ایس پی) کی سپریمو مایاوتی نے مغربی اتر پردیش کے ضلع بلندشہر میں گؤ رکشکوں کی بھیڑ کے تشدد میں ایک پولیس افسر سمیت دو افراد کے قتل کے لیے ریاست میں بھارتیہ جنتا پارٹی حکومت کو ذمہ دار ٹھہراتے ہوئے قصورواروں کے خلاف سخت کارروائی کرنے کا مطالبہ کیا ہے۔
مایاوتی نے کہا کہ ہر طرح کی افراتفری کو تحفظ دینے ہی کا نتیجہ ہے کہ اتر پردیش میں اب قانون کیرکھوالے بھی قربان ہو رہے ہیں۔ بلندشہر پرتشدد واقعہ کا شکار ہونے والے ایک پولس افسر اور ایک نوجوان کی موت پر گہرے رنج اور تعزیت کا اظہار کرتے ہوئے انہوں نے کہا کہ بی جے پی اور ان کی حکومتوں کو بھیڑکے تشدد اور افراتفری کے راج کو ختم کرنے اور قانون کا راج قائم کرنے کی پوری ایمانداری سے کوشش کرنی چاہیے تاکہ ملک کے آئین اور جمہوریت کی بھيڑ سے حفاظت کی جا سکے۔ انہوں نے کہا کہ بلندشہر کے افسوسناک واقعہ میں مرنے والوں کے خاندانوں کو صرف مناسب معاوضہ دینا ہی کافی نہیں ہو گا بلکہ اس تشدد کے لیے تمام قصورواروں کو سخت سے سخت سزا وقت پر دلانا بھی یقینی ہونا چاہیے۔