ریاست کے تین اراکین پارلیمان کے استعفے منظور
بنگلورو،29؍مئی(ایس او نیوز) حالیہ اسمبلی انتخابات میں منتخب ریاست کے تین اراکین پارلیمان بی ایس یڈیورپا(شیموگہ) بی سری راملو (بلاری) اور سی ایس پٹ راجو( منڈیا )کی لوک سبھا رکنیت سے استعفیٰ منظور کرلیا گیا ہے۔ لوک سبھا کی اسپیکر سمترا مہاجن نے ان تینوں اراکین کے استعفوں کو منظور کرنے کا آج اعلان کیا۔ 2014 کے لوک سبھا انتخابات میں کرناٹک کے تین حلقوں سے منتخب اراکین پارلیمان نے حالیہ اسمبلی انتخابات میں کرناٹک اسمبلی کے لئے علی الترتیب شکاری پور، مولکالمرو ، اور میلوکوٹے،سے منتخب ہونے کے بعد اپنی لوک سبھا رکنیت ختم کردی ہے۔ ان تینوں اراکین کے استعفوں کو 18مئی کو ہی منظور کرلیا گیا۔ اس کے ساتھ ہی کرناٹک سے لوک سبھا میں نمائندگی کرنے والے اراکین کی تعداد اب گھٹ کر 25 ہوگئی ہے۔ بی جے پی کے 16 ، کانگریس کے 9 اور جنتادل(ایس) سے ایک رکن کا اب ایوان میں نمائندگی کریں گے۔