بھٹکل 4/فروری (ایس او نیوز)  بھٹکل سے قریب 30 کلو میٹر دور منکی کنٹاکیری میں بھائی کے ہاتھوں اپنی ہی چھوٹی بہن کا قتل  ہونے کی واردات پیش آئی ہے اور پولس نے قتل کے الزام میں بھائی کو گرفتار کرلیا ہے۔ مقتول خاتون کی شناخت  جیوتی مادھیو نائک کی حیثیت سے کی گئی ہے ، جبکہ گرفتار شدہ بھائی کی شناخت ستیش مادھو نائک (30) کی حیثیت سے کی گئی ہے۔

قتل کے تعلق سے دو الگ الگ ذرائع نے دو الگ باتیں بیان کی ہیں، ایک ذرائع سے ملی اطلاع کے مطابق  جیوتی مادھو نائک جسمانی طور پر معذور ہے جس کی وجہ سے  اُس کا پورا کام بھائی ستیش کررہا تھا، بار بار کی پریشانی سے تنگ آکر اُس نے آج صبح اپنی بہن کا قتل کردیا۔ البتہ ایک اور ذرائع نے بتایا ہے کہ آج صبح قریب گیارہ بجے ستیش کی اپنی بیوی کے ساتھ جھگڑا چل رہا تھا،  ستیش کی معذور بہن جو ستیش کے گھر پر ہی رہتی ہے،  دونوں کا جھگڑا روکنے کے  لئے آگے بڑھی تو ستیش  آگ بگولہ ہوگیا اور بہن پر ہی حملہ کردیا، جس کے نتیجے میں اُس کی موت واقع ہوگئی۔

منکی پولس تھانہ میں معاملہ درج کیا گیا ہے اور پولس مزید چھان بین کررہی ہے۔