بنگلورو۔14؍جنوری (ایس او نیوز) وزیر اعلیٰ سدرامیا کے قانونی مشیر برجیش کالپا نے اپنے عہدہ سے استعفیٰ دے دیا ہے۔ بتایاجاتا ہے کہ کل رات انہوں نے دہلی سے وزیر اعلیٰ سدرامیا کے دفتر کو بذریعہ فیکس اپنا استعفیٰ روانہ کردیا۔کہا جاتاہے کہ برجیش کالپا چونکہ کاویری آبی تنازعہ کے سلسلے میں کاویری آبی تنازعہ ٹریبونل اور سپریم کورٹ میں جاری سماعت میں ریاست کی پیروی کرنے کی تیاری میں ہیں اسی لئے وہ کابینہ درجہ کے عہدہ سے استعفیٰ دے کر پیروی کی تیاری کر رہے ہیں۔ برجیش کالپا نے کہاکہ عدالتی سرگرمیوں میں انہیں زیادہ وقت لگانا ہے اسی لئے انہوں نے سرکاری عہدہ کو خیر باد کہہ دیا۔ انہوں نے کہاکہ دریائے کاویری کے علاوہ ریاست کی زبان ، زمین اور دیگر امور سے جڑے مقدمات میں بھی وہ اب کھل کر پیروی کرسکیں گے۔ یاد رہے کہ 2007 میں کاویری آبی تنازعہ ٹریبونل کی طرف سے جو فیصلہ سنایا گیا تھا حال ہی میں ریاستی حکومت کی طرف سے سپریم کورٹ میں دائر عرضی پر فیصلہ سناتے ہوئے عدالت عظمیٰ نے حکومت کو دوبارہ کاویری آبی تنازعہ ٹریبونل سے رجوع ہونے کی ہدایت دی تھی۔ اس صورتحال کو دیکھتے ہوئے برجیش کالپا نے ٹریبونل کے روبرو نمائندگی کی غرض سے اپنے عہدہ سے استعفیٰ دیا ہے۔ بعض حلقوں میں یہ بھی کہا جارہاہے کہ برجیش کالپا اس خواہش میں تھے کہ وزیر اعلیٰ سدرامیا انہیں بطور رکن کونسل نامزد کریں گے، لیکن تمام نامزدگیوں کے پورے ہونے کے باوجود بھی برجیش کا نام نہیں آیا، جس کی وجہ سے وہ ناراض ہوگئے۔ برجیش نے اپنے استعفیٰ کی وجہ یہ بتائی ہے کہ کاویری ندی چونکہ کورگ ضلع سے بہتی ہے اور ان کاتعلق اسی ضلع سے ہے اور وہ سرکاری عہدہ پر بھی فائز ہیں۔اسی لئے وہ چاہتے ہیں کہ سرکاری عہدہ چھوڑ کر کاویری معاملے کی پیروی ٹریبونل یا سپریم کورٹ میں کریں۔ کورگ کے ہی متوطن برجیش کالپا اس سے پہلے ہریانہ میں کانگریس کی ہڈا حکومت میں معاون سرکاری وکیل کے طور پر خدمات انجام دے چکے ہیں۔ان کا شمار کانگریس نائب صدر راہول گاندھی کے اقرباء میں کیاجاتاہے اور وہ فی الوقت اے آئی سی سی کے ترجمان بھی ہیں۔