شادی سے ایک دن قبل لڑکی گھر سے بھاگ گئی۔ بی جے پی لیڈر کو ہے لوجہاد کا شک !
موڈبدری 11؍دسمبر(ایس او نیوز)دھارلگُڈے کی رہنے والی پریانکانامی لڑکی اپنی شادی کی مقررہ تاریخ سے ایک دن قبل مہندی کی رسم اداکرنے کے بعد اپنے گھر سے غائب ہوگئی ہے ۔مگر اسی گاؤں کے رہنے والے بی جے پی کے ضلع صدر کے پی جگدیش ادھیکاری کو شک ہے کہ یہ لو جہاد کا معاملہ ہے۔
ادھیکاری نے اس واقعہ پرزہریلی بیان بازی کرتے ہوئے کہا ہے کہ شادی سے ایک دن پہلے اس طرح ہونے والی دلہن کا گھر سے بھاگ جانا ان شکوک کو تقویت دیتا ہے کہ چھوٹے چھوٹے دیہاتوں کی سطح پر بھی ISISکے جہادی مصروف ہوگئے ہیں۔اس لئے اس واقعہ کی ہر زاویے سے تفتیش ہونی چاہیے۔
پریانکا کے غائب ہونے کے تعلق سے ابھی کوئی بات یقین سے کہنے کی پوزیشن میں کوئی بھی نہیں ہے کہ وہ اپنی مرضی اور منصوبہ بندی کے ساتھ غائب ہوئی ہے یا اس میں کسی سازش یا اغوا کا کوئی پہلو ہے۔ لیکن بی جے پی لیڈر عوام کے ذہنوں میں زہر گھولنے میں مصروف ہوگئے ہیں۔ پریانکا کے بارے میں بتایا جاتا ہے کہ اس کی فیمیلی دھارلگڈے میں کچھ برسوں پہلے آکر بس گئی تھی۔اس سے پہلے جب وہ لوگ فرنگی پیٹ میں قیام پزیر تھے تو اس وقت پریانکا کے تعلقات ایک دوسرے طبقے کے لڑکے کے ساتھ قائم ہوئے تھے۔ بعد میں اس کے خاندان والوں نے عشق کے اس معاملے کو ختم کروایا تھا۔ اسی بات کو ذہن میں رکھ کر اسے لوجہاد کا نام دینے کی کوشش کی جارہی ہے۔پتہ چلا ہے کہ پولیس نے گمشدگی معاملہ درج کرنے کے بعد تحقیقات شروع کردی ہے اور وہ سب سے پہلے اسی لڑکے کے بارے میں جانکاری حاصل کرنے کی کوشش کررہی ہے۔بتایا جاتا ہے کہ مہندی کی رسم کے بعد رات کے وقت پریانکا نے گھر میں موجود تمام لوگوں کو جوس پیش کیا تھا، جس کا مزہ کچھ کڑوا تھا۔ گمان کیا جاتا ہے کہ اس میں پریانکا نے نیند کی گولیاں ملادی ہونگی جس سے گھر کے افراد گہری نیند کی آغوش میں چلے گئے تو پریانکا شادی کے لئے خریدے گئے 80گرام سونے کے زیورات اپنے ساتھ لے کر چپکے سے فرار ہوگئی ۔