برانڈیڈ کمپنیوں کے سامان والا پلاسٹک ٹھکانے لگانے کا نہیں ہے انتظام
کاروار2؍ستمبر(ایس او نیوز) بلدیاتی اداروں کی جانب سے وقتاً فوقتاً پلاسٹک پر روک لگانے اور دکانوں پر چھاپہ ماری کرکے پلاسٹک کی تھیلیاں ضبط کرنے کی کارروائیاں چلتی رہتی ہیں۔ لیکن گھروں سے نکلنے والے کچرے کمپنیوں سے پیاک ہوکر آنے والے کپڑوں ، غذائی اجناس اور دیگر سامان کی جو پلاسٹک پیکنگ ہوتی ہے اس کو کچرا نکاسی مرکز پر ٹھکانے لگانے کا کوئی انتظام نہیں ہے۔
ایک اندازے کے مطابق کچرا نکاسی کے دوران 40تا 50فیصد پلاسٹک کچرا وہ ہوتا ہے جو کہ برانڈیڈ کمپنیوں کے سامان سے نکلا ہوا ہوتا ہے۔ حالانکہ پلاسٹک ٹھکانے کاجو2016کاایکٹ ہے اس کے مطابق اس میں برانڈیڈ پیکنگ والے پلاسٹک کو ٹھکانے کے سلسلے میں واضح ہدایات دی گئی ہیں۔جس میں کہا گیا ہے کہ ایسے پلاسٹک کو ٹھکانے لگانے کے لئے خصوصی نگراں کمیٹی تشکیل دی جائے جس میں ان کمپنیوں کے نمائندے بھی ہوں جن کے سامان کی نکلی ہوئی پیکنگ کچرے میں شامل رہتی ہے۔ اور برانڈیڈ سامان فروخت کرنے والوں میں سے جو لوگ اس میں تعاون نہیں کرتے ان کے خلاف کارروائی کی جانی چاہیے۔
مگر معلوم ہوا ہے کہ ضلع شمالی کینرا میں ابھی تک کسی بھی شہر میں اس سلسلے میں بلدی ادارے نے کوئی اقدام نہیں کیا ہے۔برانڈیڈ آئٹمس تیار کرنے والوں کے نمائندوں سے کوئی رابطہ بھی نہیں کیا ہے۔ اس لئے پولیوشن کنٹرول بورڈ نے بلدی اداروں کو کچرا ٹھکانے لگانے کے سلسلے میں قانون پر پوری طرح عمل درآمد کرنے کے احکامات کے ساتھ نوٹس جاری کیا ہے اور پندرہ دن کے اندر جواب دینے کے لئے کہا گیا ہے۔