بامب ناگا کے گھر میں کروڑوں روپیوں کے پرانے نوٹ برآمد
بنگلورو:14/اپریل(ایس او نیوز)ریئل یسٹیٹ کاروباریوں کا اغوا،،ڈاکہ زنی، لوٹ، حملے سمیت مختلف جرائم میں ملوث سابق کارپوریٹر ناگراج عرف غنڈہ بامب ناگا کے شری رام پور میں واقع گھر اور دفتر پر پولس کے چھاپے کے دوران کروڑوں روپئے برآمد ہوئے ہیں۔وہاں پرانے نوٹوں کے کئی بنڈل ملے ہیں جن کی مالیت 35 کروڑ سے زائد بتائی گئی ہے۔چھاپے کی اطلاع پاکر وہ پہلے ہی وہاں سے فرار ہوگیا تھا۔ گھر میں بیوی اور بچے تھے۔ بیوی سے شدید پوچھ گچھ کے دوران انہوں نے ٹھیک اطلاع نہیں دی۔ شری رام پورا، ہنومنت پورا سکنڈ مین روڈ میں ناگا کے تین گھر اور ایک کمرشیل کامپلکس ہے۔وہاں ایسٹ ڈویژن ڈی سی پی اجے ہیلوری کی قیادت میں پولس ٹیم نے صبح سویرے چھاپہ مارا۔کمرشیل کامپلکس میں اسنیہا سیوا سمیتی نامی ادارہ ہے، تیسری منزل پر ناگا کا دفتر تھا۔عدالتی اجازت نامہ (summon) کے ساتھ پولس قفل پھوڑ کر اندر داخل ہوئی اور تلاشی لی۔گھر میں کوئی ہتھیار یا رقم نہیں ملی۔ تاہم تیسری منزل میں پرانے نوٹوں کے کئی بنڈل رکھے تھے، جن کی لاگت 35 کروڑ سے زائد بتائی گئی ہے۔