کوئٹہ میں بم دھماکا بچے سمیت تین افراد ہلاک، متعدد زخمی
اسلام آباد25؍نومبر (ایس او نیوز؍آئی این ایس انڈیا) بلوچستان کے مرکزی شہر کوئٹہ میں ہفتہ کی دوپہر ایک بم دھماکے میں کم ازکم تین افراد ہلاک اور 15 زخمی ہوگئے۔پولیس حکام کے مطابق نواحی علاقے سریاب روڈ پر ایک بس اسٹینڈ کے سامنے جس وقت یہ دھماکا ہوا اس وقت وہاں سے سکیورٹی ادارے کی ایک گاڑی گزر رہی تھی۔تاحال یہ واضح نہیں کہ اس بم کا اصل ہدف کون تھا۔ابتدائی اطلاعات کے مطابق دھماکے میں ایک بچے سمیت تین افراد ہلاک جب کہ 15 زخمی ہوئے۔ زخمیوں میں خواتین اور بچے بھی شامل ہیں۔دھماکے کی اطلاع ملتے ہیں سکیورٹی فورسز جائے وقوع پر پہنچ گئیں اور علاقے کو گھیرے میں لے کر لاشوں اور زخمیوں کو اسپتال منتقل کیا۔سریاب روڈ سمیت کوئٹہ کے مختلف علاقوں میں حالیہ مہینوں میں پہلے بھی تشدد کے ایسے واقعات رونما ہو چکے ہیں لیکن سکیورٹی فورسز کی عسکریت پسندوں کے خلاف کارروائیوں کے باعث ماضی کی نسبت ایسے واقعات کی تعداد میں قابل ذکر کمی واقع ہوئی ہے۔