بھٹکل کے قریب منکی میں شادی شدہ خاتون کا مبینہ قتل؛ کیا اولاد نہ ہونے پر شوہر نے ہی کیا اپنی بیوی کا قتل ؟
بھٹکل 25/مارچ (ایس او نیوز/ذاکر کٹنگری) پڑوسی تعلقہ ہوناور کے منکی قریہ میں ایک شادی شدہ خاتون کی مشکوک حالت میں نعش برآمد ہوئی ہے، جس کے تعلق سے اُس کے والد نے اُسی کے شوہر اور دیگر لوگوں پر قتل کرنے کا الزام عائد کیا ہے۔
مہلوک خاتون کی شناخت رتنا سدھاکر گوڈا (30) کی حیثیت سے کی گئی ہے۔ منکی پولس نے بتایا کہ شادی کے آٹھ سال ہونے کے باوجود اولاد نہ ہونے کو لے کر شوہراور بیوی میں اکثر جھگڑے ہوتے تھے، اسی دوران کل 24 مارچ کو اس کے بیڈروم سے خاتون کی نعش مشکوک حالت میں برآمد ہوئی جس کی گردن میں رسی بندھی ہوئی تھی۔ بتایا گیا ہے کہ واقعے کے بعد شوہر فرار ہوگیا ہے۔
اس تعلق سے خاتون رتنا کے والد ایشور گوڈا نے منکی پولس تھانہ میں شکایت درج کرتے ہوئے اُسی کے شوہر سدھاکر گوڈا سمیت تین لوگوں کے خلاف قتل کا الزام عائد کیا ہے، تھانہ میں درج شکایت کے مطابق رتنا کے شوہر ایشور گوڈا نے اپنے دیگر تین رشتہ داروں منجو گوڈا ، تمپا گوڈا اور ناگراج گوڈا کی مدد سے رتنا کو اولاد نہ ہونے کا طعنہ دینے سمیت جہینز لانے کا مطالبہ کرتے ہوئے اس کی بری طرح پیٹائی کرنے کےبعد اس کے گلے میں رسی ڈال کر اس کا قتل کیا ہے۔
منکی پولس نے جرم نمبر 24/2019، قلم 498 (A)، آئی پی سی 302 اور قلم 3,4 کے تحت معاملہ درج کرلیا ہے اور چھان بین جاری ہے۔
نعش کا آج منکی سرکاری اسپتال میں پوسٹ مارٹم کیا گیا، جس کے بعد نعش گھروالوں کے حوالے کی گئی ہے۔
