بی ایم جے مسقط کی رنگا رنگ اور شاندار عیدملن تقریب
مسقط:27 /جون (ایس او نیوز) بھٹکل مسلم جماعت مسقط کی جانب سے گذشتہ کئی سالوں کی طرح امسال بھی شاندار عید ملن تقریب منعقد کی گئی جس میں بچوں کے رنگا رنگ پروگرام ہوئے۔ عید ملن کی یہ خوبصورت تقریب مکمل 30 روزوں کے بعد عیدالفطر کی رات بعد نماز عشاء رامی ڈریم ریسورٹ، سیب میں منعقد کی گئی۔
بعد عشاء طعام کے بعد تقریبا ً 10:30بجے پروگرام کا آغاز ہوا۔ حسب ضابطہ لونا ابوبکر کے فرزند سھل کے تلاوت کلام پاک سے عید ملن تقریب شروع ہوئی۔ جس کا ترجمہ اورتشریح پیش کرتے ہوئے مولانا سید سلیم علی اکبرا صاحب نے اعمال خیر کی طرف اور انفاق فی سبیل للہ کی خاص طور پر اہمیت بتائی اور اس میں قبیلہ مضر کے کچھ لوگ نبی کریم ﷺ کے پاس پھٹے پرانے حال میں آئے ان کو دیکھ کر نبی کریم ﷺ نے صحابہ کرام ؓکو انفاق فی سبیل للہ کی ترغیب دی اور ان کی ترغیب پر نبی کریم ﷺ کے سامنے صحابہ کرام ؓ نے ایک ڈھیر لگادیاتھا جس کو دیکھ کر نبی ﷺ خوش ہو گئے، اور ان کو جنت کی خوش خبری سنائی تھی۔
دوسری طرف جماعت کے صدر محتشم حسن شبر صاحب نے افتاحی کلمات پیش کرتے ہوئے نیک کاموں کی طرف توجہ دلائی اور کہا کہ جس طرح سے ہم رمضان المبارک میں نیک اعمال کرتے تھے اسی طرح پورے سال بھی کریں۔ انہوں نے خاص طور پر مسقط ،عمان کے مختلف علاقوں میں رہائش پذیر بھٹکلی عوام کو جماعت کے ساتھ جڑے رہنے کی ترغیب دیتے ہوئے جماعت کی کارکردگی کی مختصر طورپر رپورٹ پیش کی۔
پروگرام کے مہمان خصوصی خلیج کونسل کے جنرل سکریٹری محی الدین کوچوباپا رکن الدین صاحب نے کونسل کا مختصر تعارف کرتے ہوئے خلیج کونسل کی مختصر رپورٹ پیش کی اور مسقط جماعت کے کاموں کو سراہا۔ انہوں نے کونسل کے بہت سارے امور کی طرف توجہ دلائی۔ خاص طور پر فلائٹ اسکیم کے بارے میں تفصیل بتائی۔ اور ٹیمپو سروس، اٹو رکشہ اور بھٹکل کو صاف ستھرا رکھنے کی طرف توجہ دلائی۔ انہوں نے اسی طرح بھٹکل کی سیاست کے بارے میں بھی گفتگو کی۔ یٰسین کاسرکوڈ صاحب نے تعلیمی ایوارڈ ہونہار طلبہ میں تقسیم کیں۔ اس کے بعد مہمان خصوصی کو صدر جماعت کے ہاتھوں میمنٹو پیش کیاگیا۔
بعد ازان بچوں کی رنگا رنگ تقریب شروع ہوئی جس میں بچوں نے بہت ہی دلچسپ پروگرام پیش کیا۔ جس میں مستورات کے رول کو کافی سراہا گیا۔ جماعت کے ذمہ داران نے اس بات کی سراہنا کی کہ اس پروگرام کو پیش کرنے میں مستورات نے رمضان کے مہینے میں اپنی تمام تر مشغولیات کے باوجود بچوں کو تیار کرانے میں اپنا وقت صرف کیا۔ایس ایم سید محمد شکیل صاحب نے نوائطی نظم پیش کی۔ عید ملن کنوینرعبدالواجددامودی صاحب نے کلمہ تشکر پیش کیا۔ اخیر میں ریفل ڈرا کی تقریب شروع ہوئی جس میں بڑے انعام کے طورپر 4اکٹیوا اسکوٹرا، ایک ہیرو اسپلنڈر، اور ایک بلٹ قرعہ اندازی کے ذریعے ممبران کو تقسیم کئے گئے ۔ پروگرام کا اختتام حافظ ذیان ذکریا شریف کی دعا پر ہوا۔واضح رہے کہ نظامت کے فرائض جنرل سکریٹری مرتضیٰ رکن الدین صاحب اور قمر مرچنٹ صاحب نے بحسن خوبی انجام دئے۔
