پی ایف آئی پر پابندی کے لئے 7ستمبر کو بی جے پی کی "منگلورو چلو" بائک ریالی
منگلورو 22؍اگست (ایس او نیوز)میسورو سے بی جے پی کے رکن پارلیمان پرتاپ سنہا نے ایک پریس کانفرنس کے دوران اعلان کیا ہے کہ پی ایف آئی اور کے ایف ڈی پر پابندی کا مطالبہ کرنے کے لئے 7ستمبر کو بی جے پی یووا مورچہ کے زیراہتمام "منگلورو چلو "کے عنوان سے زبردست بائک ریالی منعقد کی جائے گی۔
احتجاج کی تفصیلات بتاتے ہوئے پرتاپ سنہا نے کہا کہ ہبلی، شیموگہ، چکمگلورو،بنگلورو اور میسوروجیسے پانچ مقامات سے بائک ریالیاں نکالی جائیں گی۔ جس میں 10ہزار موٹر بائکس شامل ہونے کی توقع ہے۔ہبلی سے 5ستمبر کو اور بقیہ مقامات سے 6ستمبر کو ریالیاں منگلورو کے لئے نکلیں گی۔اس احتجاجی ریالی کا مقصد بیان کرتے ہوئے پرتاپ سنہا نے کہا کہ سال2011سے اب تک کے ایف ڈی اور پی ایف آئی پر ہندو لیڈروں اور رضاکاروں پر قاتلانہ حملوں کے بے شمار معاملات درج کیے جاچکے ہیں۔بی جے پی جب ریاست میں برسراقتدار تھی تو ہوم منسٹر آر اشوک کے زمانے میں کے ایف ڈی اور پی ایف آئی پر 175معاملات درج کیے گئے تھے۔لیکن سدارامیا جب وزیر اعلیٰ بنے تو تمام معاملات واپس لئے گئے تھے، جس سے یہ اشارے ملے کہ کانگریس پی ایف آئی اور کے ایف ڈی جیسی سماجی برائی کی پشت پناہی کرتی ہے۔اسی وجہ سے مزید سماج دشمن سرگرمیوں میں ملوث ہونے کے لئے ان تنظیموں کا حوصلہ بڑھ گیا ہے۔
پرتاپ سنہا نے کہا کہ ہم نے منگلورو کو احتجاجی مظاہرے کا مرکز اس لئے بنایا ہے کیونکہ یہیں سے پرشانت پجاری سے لے کر شرتھ مڈیوال تک ہندو لیڈروں کے سلسلہ وارقتل انجام دئے گئے ہیں۔احتجاج کے پس منظر میں مطالبہ کیا جائے گا کہ کے ایف ڈی اور پی ایف آئی پر پابندی لگے، ضلع انچارج وزیر رما ناتھ رائے مستعفی ہوجائیں اور ہندو رضاکاروں اور لیڈروں کے قتل سے متعلقہ تمام معاملات سی بی آئی کے حوالے کیے جائیں۔