نئی دہلی، 22 فروری(ایس او نیوز؍آئی این ایس انڈیا) دہلی اسمبلی کے بجٹ سیشن کے پہلے دن لیفٹیننٹ گورنر انل بیجل کے خطاب میں رکاوٹ پہنچانے کے لئے بی جے پی ممبران اسمبلی کو ایوان سے باہر نکال دیا گیا۔

ممبر اسمبلی جے این یومعاملے میں استغاثہ میں تاخیر کو لے کر ہنگامہ کر رہے تھے۔اسمبلی اسپیکر رامنواس گوئل نے ممبران اسمبلی سے امن برقرار رکھنے کے لیے کہا۔انہوں نے کہا کہ لیفٹیننٹ گورنر کا خطاب ایوان کی کارروائی کا حصہ نہیں ہے، لیکن ممبران اسمبلی نے ان کی نہیں مانی،جن ممبران اسمبلی کو باہر نکالا گیا ان میں حزب اختلاف کے رہنما وجیندر گپتا، ونے شرما اور جگدیش پردھان شامل ہیں،تینوں ممبر اسمبلی ایوان کے چیئر کے سامنے پہنچ گئے تھے جس کے بعد گوئل نے انہیں باہر نکالنے کا حکم دیا۔وجیندر گپتا نے حکومت پر جے این یو غداری کیس میں ملزمان کے خلاف استغاثہ شروع کرنے میں تاخیر کا الزام لگایا۔

دہلی پولیس نے جنوری میں جے این یو طلبا یونین صدر کنہیا کمار اور دوسروں کے خلاف 2016 کے غداری کیس میں چارج شیٹ داخل کیا تھا۔جے این یو کے سابق طالب علم عمر خالد اور انربان بھٹاچاریہ پر بھی 9 فروری 2016 کو یونیورسٹی کیمپس میں پارلیمنٹ حملے کے ماسٹر مائنڈ افضل گرو کی یاد میں رکھے گئے پروگرام کے دوران مبینہ طور پر ملک مخالف نعرے لگانے کے الزام لگے تھے۔دہلی پولیس نے دہلی حکومت سے اس معاملے میں فرد جرم چلانے کی اجازت مانگی تھی، جو ابھی تک نہیں مل پائی ہے۔