بھوپال، 24/فروری(ایس او نیوز/آئی این ایس انڈیا)بی جے پی خاتون مورچہ کی ریاستی صدر لتا ایلکر نے بہبودی برائے خواتین واطفال کی مرکزی وزیر مینکا گاندھی کے اس بیان سے اتفاق کا اظہار کیا ہے کہ بغیر ٹھوس وجہ کے عورت کا سیجیرین آپریشن کرکے ا س کو سزا نہیں دی جانی چاہیے، کیونکہ ایسا ہونے پر زچہ اور بچہ دونوں بیماریوں کے تئیں حساس ہو جاتے ہیں جس کے مہلک اثرات انہیں بھگتنے پڑتے ہیں۔انہوں نے کہا کہ دیکھنے میں آتا ہے کہ اسپتا لوں اور نرسنگ ہوم میں سیجیرین آپریشن سے ڈلیوری کرانے کی اوسط شرح بڑھتی جا رہی ہے، ایسا لگتا ہے کہ ڈاکٹر فطری ڈلیوری کرانے کے لیے تیار نہیں ہیں، بغیر ٹھوس وجہ کے ہی نارمل کے بجائے سیجیرین ڈلیوری کرانے کو زیادہ کمائی کا ذریعہ بنا رہے ہیں، جو اقتصادی نقطہ نظر اور صحت کے نقطہ نظر سے غیر مناسب ہے، اس کی حوصلہ شکنی کی جانی  چاہیے۔لتا ایلکر نے کہا کہ مینکا گاندھی کا یہ مشورہ بہت اہم ہے کہ اسپتا لوں، نرسنگ ہوم کے لیے یہ لازمی بنا دیا جائے کہ وہ نارمل ڈیلیوری اور سیجیرین آپریشن سے کی جانے والی ڈلیوری کا ریکارڈ عوامی کریں۔اس سے ڈاکٹر کی دلچسپی ظاہر ہوگی۔انہوں نے کہا کہ سیجیرین آپریشن نرسنگ ہوم کا معمول بن چکا ہے،کیونکہ اس سے اقتصادی فائدہ ہوتا ہے گرچہ اس سے زچہ بچہ کی صحت پر منفی اثر پڑتاہو۔اس مسئلہ پر حکومتوں کو بھی کوئی پالیسی کا تعین کرنے کی ضرورت پر غور کرنا چاہیے۔