مودی کی کشمیر پالیسی کی تنقید کے لیے بی جے پی نے اپوزیشن پر سادھا نشانہ
نئی دہلی، 28؍اگست(ایس او نیوز/آئی این ایس انڈیا)وزیر اعظم نریندر مودی کی کشمیر پالیسی پر تنقید کرنے کے لیے اپوزیشن پارٹیوں کو آڑے ہاتھ لیتے ہوئے بی جے پی نے آج کہا کہ جس وقت مودی وادی میں امن بحال کرنے کے لیے ان کو ساتھ لے کر چلنے کی کوشش کر رہے ہیں ، وہ اپنے سیاسی مفادات کی تکمیل کے لیے ان کی تنقید میں لگی ہوئی ہیں۔بی جے پی نے کہا کہ افسوس کی بات ہے کہ اپوزیشن پارٹیاں ان تک پہنچنے کے لیے وزیر اعظم کی تعریف کرنے کے بجائے ان پر حملے کر رہی ہیے ۔بی جے پی کے قومی سکریٹری سری کانت شرما نے کہاکہ وزیر اعظم کشمیر میں امن بحال کرنے کے لیے سخت محنت کر رہے ہیں اور انہوں نے اس سلسلے میں اپوزیشن جماعتوں کی کوششوں کی بھی تعریف کی ہے۔یہ بہت ہی افسوس ناک بات ہے کہ کانگریس جیسی پارٹیاں اپنے سیاسی مفادات اور بدنیتی کی وجہ سے ان پر تنقید کر رہی ہیں۔انہوں نے کہاکہ وزیر اعظم کی کوشش ہے کہ ترقی کے علاوہ ملکی اتحاد اور سالمیت کے معاملات میں سب کو ساتھ لے کر چلا جائے۔انہوں نے اس سلسلے میں جی ایس ٹی پر آئینی ترمیمی بل منظور کرنے کے لیے حکومت کی کوششوں کا حوالہ دیا ۔شرما نے کہا کہ پاکستان کو بے نقاب کرنے کے لیے سبھی پارٹیوں کو ایک آواز میں بولنا چاہیے جو ہندوستان کے خلاف پراکسی جنگ چھیڑ رہا ہے ۔انہوں نے کہاکہ سبھی پارٹیوں کو ایک سر میں بولنا چاہیے تاکہ ہم پاکستان کی سازشوں کو بے نقاب کر سکیں۔