پریش میستا کے گھر جائیں گے بی جے پی صدر امیت شاہ
ہوناور 10؍فروری (ایس او نیوز)کمٹہ میں 20فروری کو منعقد ہونے والے بی جے پی کے ’نوا شکتی سماویشا‘ نامی کنونشن میں شرکت کے لئے بی جے پی کے صدر امیت شاہ آنے والے ہیں۔ موصولہ اطلاع کے مطابق امیت شاہ کنونشن میں شرکت سے قبل مشکوک حالات میں فوت ہونے والے پریش میستا کے گھر جائیں گے اور اس کے والدین سے ملاقات کریں گے۔
ہوناور میں فرقہ وارانہ فساد اور بدامنی پھیلنے کے دو دن بعد 8دسمبر 2017کو پولیس اسٹیشن سے قریب ایک تالاب سے پریش میستا کی لاش دستیاب ہوئی تھی جو سڑنے اور گلنے کی حالت میں تھی۔اس دن سے آج تک بی جے پی کی طرف سے اس کو ایک طبقے کی طرف سے انجام دیاگیا قتل قرار دینے اور اس سے سیاسی فائدہ اٹھانے کی منظم کوشش کا سلسلہ چل پڑا ہے۔ شوبھا کرندلاجے، اننت کمار ہیگڈے ، نلین کمار کٹیل جیسے ریاستی سطح کے کئی بی جے پی لیڈران نے پریش میستا کے گھر جاکر تعزیت کرنے کے نام پراسے فرقہ وارانہ قتل ظاہر کرنے میں اپنا کردار اداکیا ہے۔