واڈرا کو ای ڈی کے سمن معاملے پر بی جے پی نے کانگریس پر سادھا نشانہ
نئی دہلی:6 /فروری (ایس اونیوز /آئی این ایس انڈیا)بی جے پی نے منگل کو پرینکا گاندھی واڈرا کے شوہر رابرٹ واڈرا کو منی لانڈرنگ کے معاملے میں ای ڈی سمن کو لے کر کانگریس پر نشانہ لگایا اور کہا کہ 2019کا لوک سبھا انتخاب بدعنوان لوگوں کے گینگ (گروہ)اور نریندر مودی کی شفاف حکومت کے درمیان ہے۔بی جے پی ترجمان سبت پاترا نے الزام لگایا کہ واڈرا کو یوپی اے حکومت کے اقتدار میں رہتے ہوئے 2008..09میں پٹرولیم اور دفاعی سودوں میں فائدہ ملا۔انہوں نے نامہ نگاروں کے سامنے دعوی کیا کہ کانگریس صدر راہل گاندھی کے رشتہ دار واڈرا نے اس فنڈز کا استعمال لندن میں کروڑوں روپے کی املاک خریدنے میں کیا۔بی جے پی ترجمان نے ای میل کا ذکر کرتے ہوئے الزام لگایا کہ واڈرا کی کمپنی کو ایسی کئی کمپنیوں سے رشوت ملی جنہیں کالے دھن کو سفید کرنے کے لیے بنایا گیا تھا۔انہوں نے کہاہے کہ 2019کا الیکشن بدعنوان لوگوں کے گینگ اور نریندر مودی کی شفاف حکومت کے درمیان ہے۔