بی جے پی عوام کے مسائل پر بات نہیں کر رہی ہے:اشوک گہلوت
بیکانیر ،02؍ دسمبر (ایس او نیوز؍آئی این ایس انڈیا)کانگریس کے سینئر لیڈر اور سابق وزیر اعلیٰ اشوک گہلوت نے کہا بھارتیہ جنتا پارٹی کوئی خاص مسئلے کو لے کرسیاست نہیں کر رہی ہے۔
انہوں نے الزام لگایا کہ وسندھرا راجے حکومت نے پیشرو کانگریس حکومت کے اقتدار کی کئی عوامی فلاح وبہبو د کی اسکیموں کو بند کر دیا۔
گہلوت نے کہا کہ جب کانگریس کی حکومت آئی تو انہوں نے بھیرو سنگھ شیخاوت اور وسندھرا راجے حکومت کی کوئی بھی فلاحی اسکیم بند نہیں کی یہاں تک کہ گرچہ بی جے پی راج میں ہماری اسکیم بند کی گئی ہوں لیکن ہماری حکومت آئی تو ہم وسندھرا حکومت کی کسی اسکیم کو بند نہیں کریں گے۔
انہوں نے کہا کہ وسندھرا کو لے کر ریاست کے عوام میں سخت ناراضگی ہے۔ کسی لیڈر کے والدین کے بارے میں پوچھناتنقید کا نقطہ ہو سکتا ہے، لیکن یہ کوئی سیاست کا مسئلہ نہیں ہے۔بی جے پی مسائل پر مبنی سیاست نہیں کر رہی ہے۔بی جے پی نے انتخابات کو قوموں سمیت دیگر مسائل سے جوڑ دیا۔ وزیر اعظم نریندر مودی پر نشانہ لگاتے ہوئے انہوں نے کہاکہ یہ پہلے وزیر اعظم ہیں جو اس عہدے کے وقار کو دیکھتے ہوئے بھی لوگوں کے مسائل پرسیاست نہیں کر رہے ہیں۔انہیں قومی اور بین الاقوامی سطح کے مسائل کی سیاست کرنی چاہئے۔
گہلوت نے کہا کہ جمہوریت میں انتخابات جشن کی عکاسی کرتے ہیں انہیں باہمی بھائی چارے اور میل محبت سے لینا چاہئے۔یہ لوگ کشیدگی میں رہ کر سیاست کر رہے ہیں جبکہ ہماری کسی سے کوئی لڑائی نہیں ہے۔ انہوں نے کہا کہ کانگریس کے قومی صدر راہل گاندھی بھی کہہ چکے ہیں کہ ہماری کسی سے کوئی لڑائی نہیں ہے ہماری تو نظریہ، پالیسیوں اور پروگراموں کی لڑائی ہے۔ گہلوت کے مطابق یہ لوگ راہل گاندھی، پنڈت نہرو کی بات کرتے ہیں لیکن نہرو بننے کے لئے وزیر اعظم مودی اور وسندھرا کو سو بار جنم لینا پڑے گا۔ نوٹ بندی کے سوال پر انہوں نے کہا کہ یہ فیصلہ ایک سیاہ باب ہے اور وزیر اعظم نے ملک کی معیشت کو برباد کر دیا ہے۔