راجیو پرتاب روڈی کا دعویٰ : بی جے پی کو کرناٹک میں اگلی حکومت بنانے سے کوئی بھی طاقت روک نہیں سکتی
بنگلورو24اپریل(ایس او نیوز؍یواین آئی) وزیراعظم مودی کی کورکمیٹی کے رکن راجیو پرتاب روڈی نے کہا ہے کہ بی جے پی کو کرناٹک میں اگلی حکومت بنانے سے کوئی بھی طاقت روک نہیں سکتی۔انہوں نے بنگلور کے ہیبل میں بوتھ کی سطح کے منیجرس کی میٹنگ سے خطاب کرتے ہوئے کہاکہ حالیہ سروے میں بتایا گیا ہے کہ بی جے پی کی نشستوں کی تعداد میں کافی بہتری ہوگی اور بی جے پی کامیابی حاصل کرے گی۔اس کی نشستوں کی تعداد میں اضافہ ہوگا جس سے پارٹی اکثریت کے ساتھ حکومت بنائے گی۔انہوں نے کہا کہ کرناٹک میں مودی کی انتخابی مہم کی الٹی گنتی شروع ہوچکی ہے اور اس سے ریاست کی سیاسی تصویر میں بڑے پیمانہ پرتبدیلی آئے گی۔بوتھ کی سطح کے کارکن ہی بی جے پی کی اصل طاقت ہیں اور یقینی طورپر یہ کارکن اقتدار میں واپسی کے لئے پارٹی کو مدد کریں گے ۔انہوں نے کہاکہ ہیبل حلقہ بی جے پی کے لئے مضبوط بنیاد ہے اور عوام موجودہ رکن وائی اے نارائناسوامی کی حمایت کر رہے ہیں، اسی لئے بی جے پی نے موجودہ انتخابات کے لئے ان کو دوبارہ امیدوار بنایا ہے ۔نارائنا سوامی نے کہاکہ انہیں 25000کی اکثریت سے کامیابی کا یقین ہے ۔انہوں نے کہاکہ ان کے حریف بی سریش ارب پتی ہوسکتے ہیں،کیونکہ انہوں نے اپنے 418کروڑروپئے کے اثاثہ جات کا اعلان کیا ہے تاہم انتخابات میں دولت کی طاقت وجہ نہیں ہوسکتی۔ہیبل کے عوام اس بات کو ثابت کردیں گے ۔