مدھیہ پردیش: بی جے پی ممبرپارلیمنٹ کا بیٹا نکلا منشیات کا سوداگر
بھوپال، 14 مارچ(ایس او نیوز؍آئی این ایس انڈیا) مدھیہ پردیش کے منڈلامیں پولیس نے بدھ کو اسمیک کے ساتھ راجیہ سبھا رکن سنپتیا کے بیٹے ستیندر اوکے اور دو دیگر افراد کو گرفتار کیا۔پولیس نے تینوں کو چیکنگ کے دوران گاڑی سے پکڑا تھا،ان کے پاس سے 3.380 گرام اسمیک پڑیوں میں ملی ہے۔پولیس کے مطابق لوک سبھا انتخابات کے پیش نظر ضلع میں خصوصی مہم چلائی جا رہی ہے۔بدھ کو پولی ٹیکنیک کالج کے پاس سفید رنگ کی ہونڈا برایو کار جس کا نمبر پی 20 سی بی 8532 تھا، اس کا ڈرائیور پولیس کو دیکھتے ہی تیز رفتار سے بھاگنے لگا،اس پر پولیس نے اس گاڑی کا پیچھا کیا۔کار میں تین نوجوان بیٹھے ہوئے تھے،کار روک کر ان سے تیزی سے فرارہونے کے سلسلے میں پوچھ گچھ کی گئی تو وہ جواب دینے میں ہی گھبرانے لگے،تینوں نوجوانوں اور کار کی تلاشی لی گئی۔اس پر ستیندر اوکے کے پاس سے اسمیک کی 17 پڑیاں، شاہ رخ کے پاس سے 10 پڑیا اور ابھیشیک کے پاس سے اسمیک کی 14 پڑیاں ملیں۔ان منشیات کا کل وزن وزن 3.380 گرام پایا گیا ہے۔پولیس نے تینوں کے خلاف این ڈی پی ایم ایکٹ کا کیس درج کر لیا۔پکڑے گئے تین افراد میں ستیندر اکے، بی جے پی راجیہ سبھا ممبر پارلیمنٹ سنپتیا کا لڑکا ہے۔
مرکزی جنگلات و ماحولیات کے وزیرامملکت انل مادھو ڈیو کے انتقال سے خالی ہوئی راجیہ سبھا سیٹ پر ایم پی سنپتیا کو راجیہ سبھا بھیجا گیا تھا۔منڈلاایم پی پھگن سنگھ کلستے کی انتہائی قریبی مانی جانے والی سنپتیا 12 سالوں تک ضلع پنچایت صدر کے عہدے پر قابض رہی ہیں۔سنپتیاپرمنڈلا ضلع میں منڈلا لائٹس لگانے کے نام پر کروڑوں روپے کا گھوٹالہ کرنے کا الزام بھی لگا ہے۔