کسینو میں جوا کھیلتے نظر آئے بی جے پی ممبراسمبلی، مقامی سطح پر خفیہ رپورٹ طلب
لکھنؤ،18؍اپریل(ایس او نیوز؍آئی این ایس انڈیا) ایک طرف جہاں پورے ملک میں بی جے پی لیڈران کی شرانگیزی کے قصے زبان زد ہیں وہیں بی جے پی کے ایک اور ممبراسمبلی سرخیوں میںآگئے ہیں۔ اس بار معاملہ کسینو میں تفریح کا ہے۔ دراصل مہاراج گنج ضلع کے بی جے پی ممبراسمبلی جے منگل قنوجیا کا نیپال کے روپن دیہی ضلع کے ایک کسینو میں جوا کھیلتے اور شراب کی بوتلوں کے ساتھ بیٹھے ہوئے ایک ویڈیو وائرل ہوئی ہے۔ وائرل ویڈیو نے ایک بار پھر بی جے پی حکومت پر سوالیہ نشان لگاتے ہوئے نیپالی میڈیا میں ہندوستانی نمائندوں کی شبیہ کا مذاق بنایا ہے۔ دوسری جانب اس معاملے میں پتہ چلا ہے کہ ممبراسمبلی کی رپورٹ بی جے پی کی ریاستی قیادت کی طرف سے مقامی سطح پر طلب کر لی گئی ہے۔مقامی ذرائع کے حوالے سے ملی اطلاع کے مطابق ممبراسمبلی جے منگل قنوجیا کے کارنامہ کا یہ وائرل ویڈیو نیپال کے بٹول سے پہلے منی گرام قصبہ کے پاس واقع ہوٹل ٹائیگر ریزارٹ لا کا ہے، تاہم یہ قابل غور ہے کہ یہ ویڈیو کب بنایاگیا ، اس بارے میں ابھی کوئی واضح اطلاع نہیں مل رہی ہے۔ ویڈیو میں بی جے پی ممبراسمبلی وہاں شراب کے نشے میں مست ہوکر جوا کھیلتے ہوئے نظرآرہے ہیں۔واضح رہے کہ نیپال کے بھیرہوا، بٹول کے پاس واقع کسینوکا حالیہ دنوں بیرون ممالک کی خواتین کے جسم فروشی اور ہندوستانی پرانے نوٹوں کے استعمال جیسے کنکشن کے الزامات میں جڑا ہوا ملا ہے ۔ ایسے میں سرحدی ضلع کے ایک ممبراسمبلی کا ایسی جگہ جانا کچھ بڑے سوالات کھڑے کرتا ہے۔ معاملے پر بی جے پی کی صوبائی قیادت نے مقامی سطح پر خفیہ رپورٹ طلب کی ہے۔