بی جے پی کو 150 سیٹیں ریاست کولوٹنے کیلئے چاہئے: کمار سوامی
بنگلورو،29؍مئی(ایس او نیوز) سابق وزیر اعلیٰ اور ریاستی جنتادل (ایس) صدر ایچ ڈی کمار سوامی نے اگلے اسمبلی انتخابات میں 150 سیٹوں پر کامیابی حاصل کرنے بی جے پی کے دعوے کو مضحکہ خیز قرار دیتے ہوئے کہاکہ بی جے پی کو 150 سیٹیں ریاست کی ترقی کیلئے چاہئے یا لوٹ مچانے ؟۔آج اتی بیلے تعلقہ کے ہباگوڈی میں جنتادل (ایس) کے جلسۂ عام سے خطاب کرتے ہوئے انہوں نے کہاکہ ریاست میں کانگریس حکومت کا انتظامیہ ہے یا نہیں یہ ان کی سمجھ میں نہیں آرہا ہے۔انہوں نے کہاکہ ریاست کی ترقی کیلئے آنے والے دنوں میں علاقائی طاقت جنتادل (ایس)کو اقتدار پر لانا بہت ضروری ہے۔ ریاست کے عوام نے دونوں قومی سیاسی جماعتوں کو اقتدار دے کر آزمالیا ہے، ان دونوں کی ناکامیوں سے اب عوام اکتا چکے ہیں۔ انہوں نے کہاکہ ریاست میں کانگریس اور مرکز میں بی جے پی کے انتظامیہ سے عوام سخت ناراض ہیں۔ خاص طور پر کاویری ، مہادائی ،پینے کے پانی کی فراہمی وغیرہ کے معاملے میں مرکزی اور ریاستی حکومتیں عوام کے ساتھ انانصافی کرتی آرہی ہیں۔انہوں نے کہا کہ علاقائی سیاسی جماعتوں کواگر عوام نے مضبوط کیاتو ریاست کے مفادات کی حفاظت بھی کھل کر کی جاسکتی ہے۔قومی سیاسی پارٹیاں ہمیشہ اپنے اعلیٰ کمان کی تابع ہوتے ہیں۔انہوں نے کہاکہ اپنے دور اقتدار میں انہوں نے اس وقت کے مرکزی وزیر جئے پال ریڈی کے تعاون کو جواہر لال نہرو اربن رنیول مشن بنگلور اور میسور میں متعارف کروایا ، اس سے دونوں شہروں میں 25ہزار کروڑ روپیوں کی رقم خرچ کرنے کے منصوبہ بنائے گئے۔اس موقع پر رکن اسمبلی مدھو بنگارپا ، جنتادل (ایس) کے دیگر لیڈران آر ایس منوہر ، رامے گوڈا وغیرہ موجود تھے۔