چندولی لکھنؤ21 جنوری (ایس او نیوز؍آئی این ایس انڈیا) بی جے پی کی رکن اسمبلی سادھنا سنگھ نے مبینہ طور پر بی ایس پی سربراہ مایاوتی کا موازنہ خواجہ سرا(ہیجڑا) سے کرتے ہوئے ان پر قابل اعتراض تبصرہ کیا ہے۔ سپا اور بسپا نے بی جے پی ممبر اسمبلی کی اس تبصرہ کی سخت مذمت کی ہے۔وہیں دہلی میں قومی خواتین کمیشن نے بی ایس پی سربراہ پرکے گئے تبصرہ پر از خود نوٹس لیا ہے۔کمیشن اس سلسلے میں سنگھ کو نوٹس جاری کر ان سے وضاحت مانگے گا۔ مغل رائے علاقہ سے بی جے پی ممبر اسمبلی سادھنا سنگھ نے چندولی ضلع کے کرن پورا گاؤں میں ہفتہ کو منعقد ہ کسان کمبھ پروگرام میں مایاوتی کا ذکر کرتے ہوئے کہا تھا کہ ہم کو تو اتر پردیش کی سابق وزیر اعلی نہ تو عورت لگتی ہیں اور نہ ہی مرد۔ ان کو تو اپنا احترام ہی سمجھ میں نہیں آتا۔ جس عورت کی ا س قدر کردار کشی کی گئی ہو ،اس عورت نے کرسی حاصل کرنے کے لئے اپنا سارا وقاربیچ دیا ۔ ایسی عورت مایاوتی کا ہم اس پروگرام کے ذریعہ مسترد کرتے ہیں۔انہوں نے اس سے بھی آگے بڑھ یہ بھی کہہ دا کہ وہ(مایاوتی) عورت ذات پر کلنک ہیں۔ جس عورت کی آبرو کو بی جے پی کے لیڈروں نے بچایا اسی نے عیش و آرام کے لئے اپنے وقار کو بچانے کے لئے ذلت کا پیالہ پی لیا۔ ایسی عورت توخواجہ سراؤں میں سے بھی زیادہ بدتر ہے۔ وہ نہ مرد ہے، نہ عورت ہے اس کی گنتی کس زمرے میں نہیں ہے۔ بی ایس پی کے سیکرٹری جنرل ستیش چندر مشرا نے بھی کہا کہ بی جے پی ممبر اسمبلی نے بی ایس پی سربراہ مایاوتی کے لئے جس طرح کے الفاظ استعمال کئے ہیں وہ بی جے پی کے معیار کو ظاہر کرتا ہے ۔ ایس پی۔بی ایس پی کے اتحاد کے اعلان کے بعد سے ہی بی جے پی لیڈروں کا ذہنی توازن بگڑ گیا ہے۔انہیں آگرہ اور بریلی کے اسپتالوں میں داخل کرنے کی ضرورت ہے۔غور طلب ہے کہ اتر پردیش کے آگرہ اور بریلی اضلاع میں ذہنی طور پر بیمار لوگوں کے لئے بڑے ہسپتال قائم ہیں۔بی ایس پی کے ساتھ اتحاد کرکے اگلا لوک سبھا الیکشن لڑنے جا رہی سماجوادی پارٹی کے صدر اکھلیش یادو نے بی جے پی ممبر اسمبلی کی اس تبصرہ کی مذمت کرتے ہوئے کہا کہ بی جے پی کی خاتون رکن اسمبلی نے جس طرح کے نا روا ، نازیبا، فحش اور غیر اخلاقی الفاظ بی ایس پی سربراہ مایاوتی کے لئے کیا ہے وہ انتہائی قابل مذمت ہے۔انہوں نے کہا کہ یہ بی جے پی کے اخلاقی دیوالیہ پن اور مایوسی کی علامت ہے۔ ساتھ ہی یہ ملک کی خواتین کی بھی توہین ہے۔قومی خواتین کمیشن کی صدر ریکھا شرما نے بتایا کہ ایسا نازیبا تبصرہ کسی لیڈر کو زیب نہیں دیتا ہے اور یہ قابل مذمت ہے۔واضح ہو کہ قومی خواتین کمیشن نے از خود نوٹس لیا ہے اور سادھنا سنگھ کو کل نوٹس بھیجا جائے گا۔