کرناٹک کو کانگریس سے آزاد کرنے بی جے پی لیڈروں کا عہد ، پارٹی کو اقتدار پر لانے فوجیوں کی طرح کام کرنے ورکرس کو امیت شاہ کا مشورہ
بنگلورو:13/اگست(ایس او نیوز/آئی این ایس انڈیا)ریاست کرناٹک میں زعفرانی پارٹی کو دوبارہ اقتدار پر لانے مختلف سطحوں پر پارٹی نے کوشش شروع کردی ہے۔ ریاست کے تین روزہ دورہ پر آنے والے بی جے پی کے قومی صدر امیت شاہ نے پارٹی ورکرس کو آواز دی ہے کہ کرناٹک میں2018میں اسمبلی کے لیے ہونے والے انتخابات میں بی جے پی کو اقتدار پر لانے ابھی سے فوجیوں کی طرح کام کریں۔ اسی طرح امیت شاہ نے اسمبلی انتخابات کے لیے ریاست میں بی جے پی نے اپنی مہم شروع کردی ہے۔ انتخابی حکمت عملی تیار کرنے کے مقصدسے امیت شاہ ریاست کے دورہ پر آئے ہوئے ہیں۔پارٹی ورکرس کو مخاطب کرتے ہوئے انہوں نے کہا کہ آئندہ اسمبلی انتخابات میں پارٹی کو بھاری اکثریت سے کامیاب بناکر ایڈی یورپا کی قیادت میں اگلی حکومت تشکیل دینے پارٹی ورکرس کو ایک حکمت عملی کے تحت فوجیوں کی طرح کام کرنا چاہئے۔ انہوں نے کہا کہ پارٹی لیڈروں کے درمیان جو بھی اختلافات پائے جاتے ہیں انہیں بالائے طاق رکھ کر ایڈی یورپا کو کرناٹک کا وزیراعلیٰ بنانے اور پارٹی کو اقتدارپر لانے متحدہوکر کام کرنے کی ضرورت ہے۔ انہوں نے کہا کہ کرناٹک میں ہمیں اقتدار حاصل کرنا بہت ضروری ہے۔ ہر پارٹی ورکر کو یہ ذہن میں رکھناچاہئے۔ امیت شاہ نے دعویٰ کیا کہ اگلے اسمبلی انتخابات میں ایڈی یورپا،جگدیش شٹر، اشوک کے علاوہ دیگر لیڈروں نے متحدہوکر کام کیاتو پارٹی کو کامیاب بنانا مشکل نہیں۔ انہوں نے کہا کہ کرناٹک میں اگر ہمیں اقتدار حاصل کرنا ہے تو ہمیں ایک دوسرے پر الزام تراشی کا سلسلہ بند کرنا چاہئے ورنہ ہم اپنے اپنے اختلافات سے باہر نہیں نکل پائیں گے۔ انہوں نے بتایا کہ مرکز میں نریندر مودی کی قیادت والی حکومت ملک کی کامیابی کی جانب رواں دواں ہے۔ کرناٹک میں انتخابات کے دوران مودی حکومت کی کارکردگی اور کرناٹک میں پچھلی بی جے پی حکومت کی کارکردگی سے عوام کو آگاہ کرنا چاہئے۔ بنگلورانٹرنیشنل ایرپورٹ پر آمد پر امیت شاہ کو ایڈی یورپا نے میسور پیٹھا پہناکر ان کی شال پوشی کرکے ان کا استقبال کیا۔ ایرپورٹ پر امیت شاہ کا استقبال کرنے والی بی جے پی کی ٹیم میں ایشورپا،آر اشوک،جگدیش شٹر،سدانندا گوڈا، بچے گوڈا اور دیگر شامل رہے۔ان تمام نے کرناٹک کو کانگریس سے آزاد کرنے کا بھی عہدکیا۔