بیدر میں بی جے پی کے کئی قائدین کی کانگریس میں شمولیت
بیدر۔17؍اپریل۔(محمدامین نواز / ایس او نیوز) ریاستِ کرناٹک کے کانگریسی کارگذار صدر مسٹر دنیش گنڈو راؤ نے کہا کہ کرناٹک کو کانگریس سے آزاد کرنا ناممکن ہے ۔بی جے پی لیڈروں کا اسمبلی کی150سیٹوں پر جیت حاصل کرنے کا مشن 150کا خواب ، خواب ہی رہے گا، اور وہ کبھی پورا نہیں ہوگا۔ انہوں نے دعویٰ کیا کہ ضمنی انتخابات میں بی جے پی کیلئے دو نشستیں جیتنا ممکن نہیں ہوا تو 150نشستوں پر جیت کس طرح ممکن ہے؟
مسٹرگنڈوراؤ بنگلور گاندھی نگر حلقہ کی بی جے پی خاتون لیڈر ایس ریکھا راؤ‘ ایس سی مورچہ بورڈ کے صدر اے پی راج کارتھک‘ سلم مورچہ صدر اے ایم راجو ‘سید تبریز بشمول 50سے زیادہ بی جے پی لیڈروں کو کانگریس میں شامل کرنے کیلئے منعقدہ پروگرام کو مُخاطب کرتے ہوئے بات کررہے تھے۔انھو ں نے پارٹی کے سنئیر باغی لیڈروں کی سخت تنقید کرتے ہوئے کہا کہ کچھ سنئیر لیڈر پارٹی میں رہتے ہوئے بھی پارٹی مُخالف سرگرمیوں میں ملوث ہیں۔ان لیڈروں نے اگر پارٹی مُخالف بیان بازی بند نہیں کی تو ان کے خلاف تادیبی کارروائی کرنا لازمی ہوجائے گا۔انھو ں نے کہا کہ ان سنئیر لیڈروں کے رویہ کی پارٹی ہائی کمان سے شکایت کی گئی ہے اور اگر انھوں نے اپنے رویے میں بہتری نہیں لائیں تو ان کے خلاف تادیبی کارروائی کرنے میں ہائی کمان تردد نہیں کرے گی۔انھوں نے جناردھن پجاری کا نام لئے بغیر کہا کہ منگلور کے متوطن ایک سنئیر لیڈر آئے دن پریس کانفرنس طلب کرکے کہتے ہیں کہ ضمنی انتخابات میں جیتنے سے پارٹی کا اقتدار میں لوٹنا ممکن نہیں ہے‘ بقول گنڈورائو اس طرح کے بیانات دے کر وہ پارٹی کو شرمسار کرنے پر تلے ہوئے ہیں ۔