بھٹکل 24/جولائی (ایس او نیوز) بھٹکل شہر میں ایکو بیچ اور ٹری پارک کے افتتاحی پروگرام کے سلسلے میں تشریف لانے والے وزیر جنگلات رماناتھ رائے نے میڈیا سے گفتگو کرتے ہوئے کہا کہ بھارتیہ جنتا پارٹی ہندوتوا کا نظریہ لے کر فرقہ وارانہ جذبات سے کھلواڑ کرتے ہوئے سیاست کررہی ہے جبکہ کانگریس پارٹی کمزور طبقات کو آگے بڑھانے اور ان کی ترقی کے لئے سیاست کررہی ہے۔

مسٹر رماناتھ نے جنوبی کینرا میں شرتھ مڈیوال قتل کے سلسلے میں چل رہی سیاسی ہلچل کے پس منظر میں کہا کہ منگلورو میں کارتھک اور ہریش کے قتل پر بھی بی جے پی نے اسی طرح سیاست کی تھی۔لیکن اصل مجرموں کی گرفتاری کے ساتھ ہی سچائی سامنے آگئی ہے کہ یہ سب کس کی کارستانی ہے۔بالکل اسی طرح شرتھ مڈیوال کیس میں بھی بی جے پی کی جانب سے خواہ مخواہ کی الزام تراشی اور سیاست کی جارہی ہے۔حالانکہ شرتھ مڈیوال سے پہلے دو مسلم نوجوانوں کا قتل بھی ہو چکا ہے مگر بی جے پی والے اس کے بارے میں کوئی بات نہیں کرتے۔ اس کے علاوہ بی جے پی والے ہندو مقتولوں کے گھر ہی جاکر ملاقاتیں کررہے ہیں۔انہوں نے کسی بھی مسلم مقتول کے گھر جانے کی زحمت نہیں کی ہے۔ اسی رویے سے بی جے پی کی فرقہ وارانہ ذہنیت ظاہر ہوتی ہے۔وزیر موصوف نے زور دے کر کہا کہ بی جے پی جنوبی کینرا میں عوام کو راہ سے بھٹکانے کے کام میں لگی ہے مگر وہ کبھی بھی اس منصوبے کو کامیاب ہونے نہیں دیں گے۔