راہل کے تابڑ توڑ حملہ سے بی جے پی حواس باختہ ،امیٹھی میں لیا جا رہا ہے اس کا بدلہ
لکھنؤ،13؍اکتوبر ( ایس او نیوز؍آئی این ایس انڈیا) راہل گاندھی کو کانگریس کا نیا صدر بنانے کو لے کر پارٹی کی سطح سے بلند ہوتی صدا کے درمیان بی جے پی، نہرو گاندھی خاندان کی امیٹھی سیٹ میں راہل گاندھی کی حوصلہ شکنی کرکے پارٹی کو شدید نقصان پہنچانے کی منطق میں بی جے پی اپنی سی کوشش کر رہی ہے ۔ گجرات میں بھگوا سرکار پر تابڑ توڑ حملوں سے شکست خوردہ ہوکر بی جے پی امیٹھی میں اپنی فطری جارحیت پر آمادہ ہے اور بی جے پی کا یہ رد عمل یہی کچھ اشارہ کرتا ہے ۔ سیاسی مبصرین کے مطابق راہل گجرات دورہ پر حکمراں جماعت پر جو تیز حملہ کر رہے ہیں اور ان کی ناکامیوں کی تفصیل بتار ہے ہیں اس سے بی جے پی شکست خوردہ ہوکر جوابی بھگوا حملہ کر رہی ہے ۔ گذشتہ10 اکتوبر کو امیٹھی میں بی جے پی صدر امت شاہ اور گزشتہ لوک سبھا انتخابات میں اسی علاقے سے راہل گاندھی کو سخت ٹکر دینے والی مرکزی وزیر اسمرتی ایرانی کا پروگرام اسی مقصد سے ہوا تاکہ راہل کو گجرات کا جواب امیٹھی سے دیا جائے ۔ اپردیش کی یوگی آدتیہ ناتھ حکومت کے وزیر اوقاف ور امیٹھی کے انچارج وزیر محسن رضا نے گجرات کا جواب امیٹھی سے دینے کی بی جے پی کی حکمت عملی کے بارے میں پوچھے جانے پر بتایا کہ امیٹھی توکانگریس کے لئے موروثی سیٹ ہے ۔ دادی سے والد اور والد سے بیٹااسی پارلیمانی نشست سے پارلیامنٹ پہنچے ہیں ۔ اس وقت امتی لوک سبھا حلقے کے عوام لوگ بی جے پی کی حمایت کرتے ہوئے نظر آ رہے ہیں ، آنے والے وقت میں ہم امیٹھی میں مزید سیاسی سرگرمی دکھائیں گے ۔ محسن رضا نے کہا کہ عوام نے امیٹھی کے تحفظ کی صورت میں وزیر اعظم کو دیکھا ہے ۔کوئی انتخاب نہ ہونے کے باوجود عوامی بھیڑ کا امیت شاہ کی تقریر سننے جانا اس بات کی علامت ہے کہ راہل گاندھی کو امیٹھی کے عوام نے’ خدا حافظ‘ کہہ دیا ہے۔ شاید یہی وجہ ہے کہ راہل انتخابات میں مقابلہ کے لئے کر ناٹک سے کوئی سیٹ ڈھونڈ رہے ہیں ۔ اس سے قبل بی جے پی کے ترجمان شاہنواز حسین نے بھی راہل گاندھی پر تلخ تبصرہ کرتے ہوئے کہا تھا کہ کانگریس کے یوراج راہل گاندھی کو ایک عورت ( اسمرتی ایرانی ) سے ڈر لگتا ہے ۔ ماہرین کا خیال ہے کہ امیٹھی کو بدحال ثابت کرنے کی کوشش کر کے بی جے پی کانگریس کو سخت سیاسی چوٹ پہنچانے کی کوشش میں ہے ۔ راہل گاندھی ابھی گجرات کے دورے پر ہیں اور مودی اور امیت شاہ کے انتخابی حلقوں میں دورہ کرکے بی جے پی کی ناکامیوں کی شرح و تفصیل بتا رہے ہیں، راہل گاندھی ٹوئٹر اور اپنے اجلاس میں بی جے پی پر سخت حملہ کر رہے ہیں جس سے بی جے پی خیمہ شکست خوردہ ہوچکا ہے ۔