روہنگیائی پناہ گزینوں کے نام پر عوام کوبی جے پی مشتعل کررہی ہے : این سی
جموں ،19 ؍اگست (ایس او نیوز؍آئی این ایس انڈیا) نیشنل کانفرنس کے ایک سینئر لیڈر نے بی جے پی پر جموں میں غیر قانونی روہنگیا پناہ گزینوں کی موجودگی پر لوگوں کو اکسانے کا الزام لگایا اور کہا کہ اس نے گزشتہ چار سال میں انہیں واپس بھیجنے کے لئے واقعی کچھ نہیں کیا۔
نیشنل کانفرنس کے صوبائی صدر دویندر سنگھ رانا نے یہاں اپنی نگروٹا اسمبلی سیٹ میں ایک روزہ دورے پر خطاب کرتے ہوئے کہا کہ بی جے پی چھاتی پیٹنے اور لوگوں کو بھڑکانے کے علاوہ کیوں کوئی کارروائی نہیں کر رہی ہے۔این سی لیڈر نے مسئلے کو طول دینے کے لئے بی جے پی کی تنقید کی۔
رانا نے کہا کہ روہنگیا پناہ گزینوں کو غیر ملکی قانون کے تحت واپس بھیجنے سے نئی دہلی اور سرینگر کو کون روک رہا ہے۔اس کے ساتھ ہی انہوں نے آرٹیکل 35 اے کی بھی وکالت کی جو ریاست کے مستقل باشندوں کو خصوصی حقوق کی ضمانت لیتا ہے ۔انہوں نے کہا کہ اب آرٹیکل 35 اے کی مطابقت پہلے سے بھی کہیں زیادہ اہم ہے۔